• Er acòrd prevé ua aportacion economica de enquia 18.000 èuros annuaus entà fomentar era participacion enes mòstres de bestiar des hèires ramadères dera Val d’Aran.

Eth Conselh Generau d’Aran a aprovat eth convèni de collaboracion damb es tres associacions ramadères deth territòri entara organizacion e realizacion des mòstres d’animaus laguens des hèires ramadères de tardor de Les, Salardú, Vielha e Bossòst.

Aguest acòrd s’emmarque ena volontat dera institucion aranesa de dar supòrt ath sector ramadèr, fomentar era participacion des professionaus e contribuir ara conservacion d’ua activitat fondamentau entath patrimòni, era economia e era identitat dera Val d’Aran.

Eth convèni establís ua aportacion economica maxima de 18.000 èuros annuaus, damb un limit de 6.000 èuros entath conjunt des activitats de cada associacion ramadèra.. Era quantitat definitiva depenerà des despenes efectivament realizades e justificades.

Es activitats que se desvoloparàn enes quate hèires seràn consensuades cada an entre es associacions ramadères e eth Conselh Generau d’Aran, damb er objectiu de garantir ua distribucion proporcionada des accions entre es quate poblacions.

Eth convèni establís tanben es condicions entara justificacion des despenes e eth pagament dera subvencion.

En çò que tanh as prèmis des mòstres, se poderàn justificar es quantitats autrejades as ramadèrs, damb un limit de 300 èuros per ramadèr e era documentacion acreditativa corresponenta.

Tath conselhèr de Territòri, Ramaderia e Transicion Ecologica, Francisco Bruna: “Damb aguesta iniciativa, eth Conselh Generau d’Aran reafirme eth sòn compromís damb era ramaderia aranesa e damb eth manteniment des hèires de tardor coma espacis de promocion deth bestiar, de transmission des tradicions e de dinamizacion dera economia locau”.

Er acòrd a ua vigéncia prevista de quate annades, deth 1 de gèr de 2026 enquiath 31 de deseme de 2029, e consolide era collaboracion entre era administracion aranesa e es associacions deth sector.

Vielha, 09 d’octobre de 2026