Era sedença deth Conselh Generau d’Aran acuelhie era presentacion dera siesau edicion dera HOKA Val d’Aran by UTMB®, que se harà entre eth 1 e eth 5 de junhsèga e tornarà a convertir era Val d’Aran en epicentre mondiau deth trail running.

En acte, se presentauen es principaus nauetats d’enguan, e tanben es dades de participacion, damb era preséncia des milhors corredors e corredores deth mon e es accions impulsades en matèria de sostenibilitat e seguretat.

Eth Conselh Generau d’Aran reafirme, un an mès, eth sòn compromís damb er espòrt, era promocion internacionau deth territòri e eth desvolopament sostenible collaborant ena organizacion d’un eveniment que contribuís a situar era Val d’Aran coma ua destinacion de referéncia entara practica des espòrts de montanha.

Nauetats tara edicion de 2026

Era principau nauetat d’enguan ei era incorporacion dera TDL – Termières dera Libertat, ua naua pròva de 75 quilomètres e 5.000 mètres de desnivèu positiu, includida ena categoria 100K, que se correrà eth dimèrcles 1 de junhsèga. Aguesta corsa hè a créisher era aufèrta esportiva der eveniment e permeterà as participants descorbir naui itineraris e espacis emblematics dera Val d’Aran.

Per siesau an consecutiu, era pròva mantierà era condicion d’UTMB® World Series Major, era gran finau europèa deth circuit, en tot aufrir eth doble de Running Stones as finishers e places dirèctes entàs UTMB® World Series Finaus de Chamonix.

Era celebracion dera HOKA Val d’Aran by UTMB® compde, un an mès, damb eth supòrt deth Conselh Generau d’Aran, ua implicacion que contribuís a consolidar era pròva com un des eveniments esportius mès importanti deth territòri e ua referéncia internacionau deth trail running.

Era corsa represente ua oportunitat unica entà projectar era Val d’Aran per tot eth mon, atrèir a milèrs de participants e acompanhants e generar un impacte positiu ena activitat economica locau. Ath madeish temps, permet dar visibilitat ath patrimòni naturau, culturau e paisatgistic aranés, e refortir eth posicionament dera destinacion coma referent deth torisme esportiu e de montanha.

Era collaboracion deth Conselh Generau d’Aran s’includís en sòn objectiu de promocion d’eveniments restacadi damb es valors dera sostenibilitat, era innovacion e eth respècte entar entorn naturau, elements que formen part dera identitat dera Val d’Aran e dera filosofia dera HOKA Val d’Aran by UTMB®.

Vielha, 26 de junh 2026