• Era sindica d’Aran s’a adreçat per carta as ministres d’Interior, Fernando Grande-Marlaska, e de Transpòrts e Mobilitat Sostenibla, Óscar Puente, entà reclamar era màger celeritat possibla entara milhora dera N-230 e que s’aumente era seguretat dera via.

• Eth Govèrn d’Aran tanben demane garantir contròls efectius enes restriccions dera circulacion de camions ath long dera tempsada d’iuèrn.

Eth Conselh Generau d’Aran a hèt a arribar formaument ath Ministèri der Interior e ath Ministèri de Transpòrts e Mobilitat Sostenibla era sua preocupacion pera situacion dera carretèra N-230, e a reclamat mesures urgentes entà milhorar era seguretat d’ua via que registre fòrça accidents e que hè ans qu’ei considerada ua des mès perilhoses der Estat.

Era sindica d’Aran, Maria Vergés, a manat cartes as dus ministèris enes quaus alèrte dera creishenta inquietud sociau existenta ena Val d’Aran e enes territòris dera Ribagòrça pera manca d’auanci visibles ena milhora d’aguesta infraestructura e peth naut volum de transit pesant que supòrte cada dia.

Era N-230 constituís era principau connexion terrèstra entre era Val d’Aran, França e era rèsta der Estat espanhòu. Totun, eth sòn traçat e es sues caracteristiques actuaus son insufisentes entà absorbir ua circulacion damb centenats de camions cada dia, ua circonstància que contribuís a aumentar eth risc d’accidents e era percepcion d’inseguretat entre es usatgèrs abituaus dera carretèra.

«Era situacion ei insostenibla. Milèrs de persones circulen per aguesta carretèra cada dia e non mos podem arriscar a patir accidents grèus sense que se prenen mesures efectives e immediates», senhalen hònts deth Conselh Generau d’Aran.

Dauant d’aguesta realitat, er executiu aranés a sollicitat un refòrç des contròls en periòdes de maxima afluéncia de transit e ua màger vigilància deth compliment des restriccions de circulacion entàs veïculs pesants. Tanben a demanat era implicacion coordinada des administracions competentes entà garantir mès seguretat ena via.

Des der an 2019, eth Govèrn d’Aran sollicite cada an que se limite eth pas des camions pera N-230 pendent era tempsada d’iuèrn. Aguesta peticion s’adrece tant ara Direccion Generau de Transit (DGT) com ath Servici Catalan de Transit, damb er objectiu de garantir era seguretat des usatgèrs e usatgères d’aguesta carretèra.

Tanben se demane de manèra reïterada que se hèsquen es contròls de besonh entà assegurar eth compliment d’aguestes restriccions. Parallèlament, s’a trasmetut ath Ministèri de Transpòrts e Mobilitat Sostenibla era grana preocupacion deth govèrn aranés per estat dera N-230 e era necessitat d’implementar mesures immediates entà garantir era seguretat des persones que i circulen.

Atau madeish, eth Conselh Generau d’Aran a reïterat ath Ministèri de Transpòrts era necessitat d’accelerar es projèctes d’adequacion e milhora dera N-230, ua reivindicacion istorica compartida pera Val d’Aran e es territòris dera Ribagòrça catalana e aragonesa. En aguest sens, tanben a sollicitat informacion actualizada sus er estat des intervencions previstes, e ua amassada damb eth ministre entà tractar dirèctament aguesta qüestion, maugrat èster conscients deth compromís deth Ministèri entà hèr realitat era adequacion e milhora d’aguesta via.

Eth govèrn aranés considere qu’era milhora dera N-230 ja non se pòt ajornar mès e reclame accions concrètes que permeten redusir es risqui qu’aguesta carretèra supause entara seguretat de milèrs de ciutadans, atau coma garantir es comunicacions adequades entà un territòri estrategic enes relacions transfronterères entre er Estat espanhòu e França.

Vielha, 4 de junh de 2026