• Es persones que volguen se pòden inscríuer dejà, mès cau rebrembar qu’es places son limitades e per orde d’inscripcion

Dejà ei dubèrta era preinscripcion online entàs corsi d’aranés 2021-2022 deth Conselh Generau d’Aran, adaptadi as diferents nivèus.

“Aguestes classes d’aranés representen un esturment fòrça important entà mantier viua era lengua, normalizar-la e apropar-la as persones nauvengudes o aqueres que volguen ampliar es sòns coneishements”, afirme era sindica d’Aran, Maria Vergés, en tot híger que “enguan, pr’amor dera evolucion positiva dera pandemia pendent es darrèri mesi, tornam a recuperar eth format de classes presenciaus, en tot combinar-les damb es classes online, en nivèu A1”.

Es persones que volguen se pòden inscríuer dejà, mès rebrembam qu’es places son limitades e per orde d’inscripcion. Un còp realizada era prematricula, se receberà un corrèu electronic en quau s’includirà eth numerò de compde bancari entà realizar eth pagament dera matricula e es classes començaràn a compdar deth 18 d’octobre.

Es oraris variaràn segontes eth nivèu:

• Nivèu A1 (presenciau): es dimars de 18:00 a 20:00 ores.
• Nivèu A1 (online): es dimars de 18:00 a 20:00 ores.
• Nivèu A2: es deluns de 19:00 a 21:00 ores.
• Nivèu B1: es deluns de 19:00 a 21:00 ores.
• Nivèu B2: es dijaus de 18:00 a 20:00 ores.
• Nivèu C1: orari per establir.

Eth prètz generau dera matricula ei de 52 euròs (72 entàs inscrits enes corsi de Barcelona), entath personau dera administracion eth prètz ei de 26 euròs (36 euròs entàs inscrits en Barcelona), e era matricula serà de franc entàs estudiants empadronadi en Aran, e es persones en situacion de caumatge o jubilades. Entà totes es tarifes redusides serà de besonh aportar justificant.

Dejà pòs realizar era tua preinscripcion ramplint aguest formulari, rebremba qu’es places son limitades per orde d’inscripcion!