Eth Conselh Generau d’Aran a acuelhut un seminari des grops de trabalh deth Plan de refugis deth projècte ENTREPYR II, que ei part deth Programa de Cooperacion Territoriau Europèa INTERREG V-A (Espanha-França-Andòrra) POCTEFA 2014-2020.
Eth seminari, realizat eth dijaus 3 e eth diuendres dia 4 de mai, acuelh diferenti grops de trabalh sus tematiques referentes ad aguest Plan de refugis transfronterièrs, es encastres coma era modernizacion des refugis, bones e males practiques deth trabalh des guides, diagnostic e qualitat des refugis e aubèrges, gestion mieiambientau, seguretat e emergéncies, promocion, comunicacion e comercializacion, recomanacions des des burèus de torisme, e era formacion des agents, entre d’auti ahèrs.
Eth seminari tanben a includit collòquis e conferencies sus eth Plan de desvolopament toristic des zònes naturaus de nauta montanha pirenenca, sus es refugis d’Aragon, e es presentacions e metuda eth comun des accions de cada grop de trabalh.
ENTREPYR II ei un projècte que recuelh coma un des sòns objectius principaus arténher qu’es amants des montanhes recorren indistinta e amassa es refugis espanhòus, francesi e andorrans, e era utilizacion des naues tecnologies enes refugis deth Pirenèu.
Eth Conselh Generau d’Aran participe en aguest projècte europèu amassa damb era Federación Aragonesa de Montañismo, era Federació d’Entitats Excursionistes de Catalonha (FEEC) e eth Gobierno de Aragón per part espanhòla, amassa damb eth Parc National des Pyrénées, L’Université de Toulouse III e era Federation Française des Clubs Alpins et de Montagne pera part francesa, e era Federació Andorrana de Muntanyisme coma entitat associada.
Cau arrebrembar qu’a trauès deth projècte ENTREPYR II, damb ua subvencion de 97.500 €, eth Conselh Generau d’Aran installarà es dus refugis de montanha dera Val d’Aran dus banhs shuts e dues potabilizadores entath tractament d’aigües residuaus. A part d’aguestes melhores eth Conselh Generau tanben a previst destinar part d’aguesta subvencion ara melhora dera promocion e comercializacion des rotes de senderisme dera Val d’Aran atau coma era difusion dera madeisha via web.
POCTEFA ei un programa europèu de cooperación transfronterièra creat entà fomentar eth desvolopament sostenible, atau coma entà refortilhar era integracion economica e sociau deth territòri de Catalonha que limite damb França e Andòrra, a trauès deth finançament de projèctes dessenhadi e geridi per organismes publics e privadi des dus costats des Pirenèus. Eth Programa se finance a trauès deth Hons Europèu de Desvolopament Regionau (FEDER).
