15 ans de colònies d’ostiu dera Associacion Espanhòla contra eth Càncer ena Val d’Aran

Eth Conselh Generau d’Aran, que collabore damb aguestes colònies, signarà un convèni damb era Associacion Espanhòla contra eth Càncer.

Mès de 1.500 mainatges an participat pendent aguesti ans enes colònies.

OLYMPUS DIGITAL CAMERA

Eth conselhèr de Salut e Benéster, Eduardo Valdecantos, a visitat es colònies entà mainatges qu’an patit ua malautia oncologica, que pendent aguesta setmana se desvolòpen ena Val d’Aran. Aguesta iniciatiua, pionèra eth tot er Estat, pòrte 15 ans en tot realizar-se ena Val d’Aran.

Ath torn de 100 mainatges e joeni se lòtgen ena Aubèrja Era Garona de Salardú, e realizen pendent aguesti dies ua sèria d’activitats coma ràfting, talhèrs de teatre, espòrts, montar a shivau, eca. Çò que se preten crear un espaci de léser e temps liure a on es mainatges e joeni qu’an agut càncer poguen aluenhar-se der entorn espitalari e es visites regulars ath mètge, e agen era possibilitat de víuer ua experiéncia gratificanta en tot melhorar atau era qualitat de vida deth mainatge malaut de càncer e dera sua familha.

Aguestes colònies, organizades pera Associacion Espanhòla contra eth Càncer de Lleida, damb eth supòrt deth Conselh Locau dera Val d’Aran, compden damb ua equipa de recorsi umans fòrça complèt que van des dera coordinadora, director e equip de monitors deth projècte, ath delà deth personau sanitari en que i participen un psicooncòleg, tres pedriatres, dus infermièrs, sense tier en compde es volontaris e d’aute personau de supòrt entà traslats e es activitats.

Coma totes es prestacions que s’amien a tèrme des dera AECC son gratuïtes, peth qu’ath delà de cercar tot tipe de subvencion se realizen diferentes activitats benefiques entà poder dar contunhitat ad aguest projècte, que damb es d’enguan, arriben as 15 ans consecutius dera sua realizacion.

Valdecantos, ena sua visita a manifestat era volontat deth Conselh Generau d’Aran de signar un convèni damb era Associacion a on s’arrecuelhe era collaboracion mutuau que ja se desvolope en diferenti encastres, damb era fin d’optimizar e refortilhar es estructures qu’an de facilitar eth compliment des objectius qu’amie a tèrme era AECC. Entre d’autes collaboracions, eth Conselh Generau d’Aran assumís era despena deth transpòrt public intèrn.

Comments are closed.