Vielha, 29 de seteme de 2017.- Eth Conselh Generau d’Aran a trauès deth departament d’Agricultura, Ramaderia e Miei Naturau d’Aran, organize es dies 18, 19 e 20 d’octobre eth 4au Congrès d’Agents Forestaus e Mieiambientaus d’Espanha e deth sud d’Euròpa.

Eth congrès qu’en edicions anteriores s’a celebrat en ciutats coma Còrdoba e Toledo, compdarà ena edicion dera Val d’Aran, damb era participacion d’Agents Forestaus e Mieiambientaus de totes es comunitats autonòmes e d’agents provenenti de Portugau, França, Andòrra, Itàlia, e era participacion coma ponent d’un agent provenent des Estats Units de Nòrdamèrica.

Pendent es tres dies de congrès que se demore que participen apuprètz 550 Agents Forestaus e Mieiambientaus, s’amiaràn a tèrme ponéncies e taules redones entà debàter sus emergéncies ambientaus, investigacion de podoms damb unitats canines, incendis o abocaments, entre d’auti.

Un des punts importants deth congrès serà eth dera seguretat des Agents Forestaus e Mieiambientaus, sustot dempús dera mòrt des agents ruraus, eth passat mes de gèr en Aspa, ena comarca deth Segrià. Justaments pendent er acte d’inauguracion deth congrès se realizarà ua menuta de silenci en memòria des dus agents desapareishudi.

Un aute des aspèctes a destacar deth congrès, serà era prepausa de Lei basica estatau entà tot eth collectiu qu’actuauments se trabalhe en Congrès des Deputats.

Cada dia s’organizaràn taules redones e ponéncies sus seguretat e risqui laboraus, seguretat ambientau e comunicacions a cargue d’agents especializats, projèctes sus unitats canines e deteccion de podoms, e sus delictes a trauès des naues tecnologies e com perseguir-les.

Pendent es dies deth congrès tanben auràn lòc diuèrs exibicions des unitats canines e demostracions de diuèrses accions damb era ajuda de dròns.

Eth congrès se celebrarà ena Ermita de Santa María de Mijaran.

Trobaràtz era informacion complèta deth programa deth 4au Congrès d’Agents Forestaus e Mieiambientaus en http://www.cafmavaldaran.com/Programa-2/