Er esquiador aranés, Álex Puente, harà concurréncia es pròplèus dies 19 e 22 de hereuèr en es Jòcs Olimpics d’Iuèrn de Sochi

GS_Schonired_13-14 3

 

• Er esportista, de 19 ans, debutarà atau en uns Jòcs Olimpics

• Format en CAEI dera Val d’Aran, residís des de hè uns ans en Soïssa a on prepare es sues sasons

• Eth Conselh Generau d’Aran li aufrís ua subvencion pr’amor que pogue hèr concurréncia a nivèu internacionau

Eth joen esquiador Álex Puente (19 ans e naturau de Vielha) prenerà part es dies 19 e 22 de hereuèr en dues competicions des Jòcs Olimpics de Sochi (Russia). Eth dia 19 participarà ena modalitat d’Eslalom Gigant e eth dia 22 ena modalitat d’Eslalom.

Puente harà concurréncia per prumèr còp en uns Jòcs Olimpics damb era unica mèta d’anar madurant esportivament e participar sense cap tipe de pression. Com eth madeish comentaue dempús de conéisher era sua designacion coma integrant der equip olimpic espanhòu “afronti aguest rèpte damb illusion e desir de hèr concurréncia, víuer era experiéncia e çò que compòrte uns Jòcs Olimpics”.

Álex Puente se formèc en CAEI (Club Aranés d’Espòrts d’Iuèrn), mès dempús de hè diuèrsi ans residís en Soïssa a on entrene entà hèr concurréncia a nivèu internacionau.

Ath delà, Puente compde damb eth supòrt des institucions publiques dera Val d’Aran. Eth Conselh Generau d’Aran aufrís ua subvencion as esportistes professionaus deth territòri, entre es quaus se tròbe Puente, entà poder hèr concurréncia dehòra d’Espanha. A compdar d’aguest convèni de collaboracion, es esportistes pòrten logos dera Val d’Aran ena sua ròba de competicion.

Es oraris concrèts dera participacion d’Álex Puente en Sochi seràn es següents: eth dimèrcles, 19 de hereuèr, Álex Puente prenerà era gessuda der Eslalom Gigant entàs 08h00 e eth dissabte, 22 de hereuèr, participarà entàs 13h45 ena modalitat d’Eslalom.

Des dera Val d’Aran li enviam tota era sòrt deth mon pr’amor que hèsque concurréncia eth melhor que pogue e gaudisque d’aguesta experiéncia olimpica. Coma aranesi, mos sentem capinauti d’èster representadi en Sochi per Álex Puente”, comentaue eth sindic d’Aran, Carlos Barrera.

Comments are closed.