Era Val d’Aran optarà ath prèmi ena categoria Destination Leadership que se coneisherà pendent era pròplèu edicion dera ITB de Berlin

Eth territòri a estat escuelhut coma un des 15 finalistes entre 150 candidats

Era Val d’Aran ei finalista d’un des National Geographic World Legacy Awards que se haràn conéisher pendent era hèira ITB de Berlin en mes de març de 2015.

Eth territòri aranés a estat designat en Singapor coma un des tres finalistes ena categoria Destination Leadership, amassa damb Aruba Tourism Authority (Aruba) e Delaware North Yosemite (Estats Units). En totau s’an escuelhut 15 finalistes d’un totau de 150 candidats, dat qu’aufrís mès valor ara candidatura dera Val d’Aran.

Aguesta categoria premie ara destinacion cabecièra que demòstre era aplicacion des melhores practiques ena proteccion der eretatge naturau e culturau, e qu’eduque as visitants jos es principis de sostenibilitat.

Era certificacion Biosphere Destination autrejada pera UNESCO arreconeish era sostenibilitat deth torisme que se desvolòpe ena Val d’Aran, e que li autrege mès qualitat ara destinacion toristica, qu’a estat eth prumèr de nauta montanha a arténher aguesta reconeishença.

National Geographic a fondat mès de 11.000 recèrces, projèctes d’exploracion e conservacion, e es sòns programes d’educacion promòn es coneishences geografiques.

“Èster ena finau d’ua des categories des National Geographic World Legacy Awards autrege mès qualitat ara nòsta destinacion toristica, donques que hègem concurréncia un totau de 150 candidats”, comente era conselhèra de Torisme, Comèrç e Consum, Anna Díaz.

“S’arreconeish eth trabalh de toti es sectors implicadi en torisme dera Val d’Aran, e era certificacion Biosphere Destination que siguec concedida pera UNESCO mos place en mapa internacionau de destinacions toristiques”, ahig Díaz.