- Ena finau son Aruba Tourism Authority (Aruba), Delaware North Yosemite (Estats Units) e era Val d’Aran
- Era ceremònia d’autrejament de prèmis se poderà seguir eth dirècte eth dijaus, dia 5 de març, a compdar des 16h45, en: www.nationalgeographic.com/worldlegacyawards
Era conselhèra de Torisme, Comèrç e Consum d’Aran, Anna Díaz.
Era Val d’Aran a arribat ara finau d’aguesti prèmis en apartat de Destination Leadership, aguesta categoria premie ara destinacion lidèr que demòstre era aplicacion des melhors practiques ena proteccion dera natura e era cultura, e que trabalhe damb es sòns visitants entà per’mor de sensibilizar-les ena proteccion deth miei ambient.
Entà as tres destinacions que participen ena finau se hec ua seleccion de 15 finalistes d’un totau de 150 participaires. Ena finau son Aruba Tourism Authority (Aruba), Delaware North Yosemite (Estats Units) e era Val d’Aran. Sonque er hèt d’arribar ara finau ja represente un gran trionf entà Aran, que trabalhe hè temps entà protegir eth sòn territòri e preservar eth sòn eretatge naturau e istoric.
Eth Conselh Generau d’Aran e Foment de Torisme Val d’Aran vòlen profitar era grana difusion d’aguesti prèmis entà mostrar era val, entà difóner coma se trabalhe entà preservar era natura e tanben eth patrimòni, er arquitectonic e er istoric, aqueth qu’a a veir damb es tradicions e era cultura aranesa. Tanben se vò aufrir era grana varietat de lotjaments, de productes toristics e era aufèrta complementària que hèn dera val ua destinacion excellenta entà quinsevolh perfil de viatgèr.
En espaci d’exposicion qu’era Val d’Aran aurà ena ITB de Berlin s’a previst un corner entà atier as mejans estrangèrs qu’an ja manifestat eth sòn interès pera destinacion e saber deth sòn classament coma finalistes enes prèmis World Legacy Awards. Aquiu era conselhèra de Torisme, Comèrç e Consum d’Aran, Anna Díaz, les atierà personauments.
Segons a declarat eth sindic d’Aran, Carlos Barrera, “aguesta ei ua bona oportunitat entà mostrar era Val d’Aran, mos cau arrespóner ar interès que ja manifèsten pera val es mejans, mès que mès es alemands e tanben mos cau senter-mos fòrça satisfèts per èster ena finau d’aguesti prèmis tan importants, ei era confirmacion qu’eth camin que seguim per çò qu’ei dera evolucion deth torisme ei eth corrècte”.
Sus era Val d’Aran:
Era Val d’Aran a era certificacion Biosphere Destination qu’autrege era UNESCO, ua denominacion qu’arreconeish era sostenibilitat deth torisme que se hè ena val, de hèt, ei era prumèra destinacion de montanha deth mon qu’a aguesta reconeishença.
Era ceremònia d’autrejament de prèmis se poderà seguir eth dirècte eth dijaus, dia 5 de març, a compdar des 16h45, en: www.nationalgeographic.com/worldlegacyawards