• Es concorsi compden damb era participacion de 20 equips des Bombers dera Generalitat, entre es quaus i a er equip des Pompièrs d’Aran, e 15 des Bombers de Barcelona
• Es tres equips melhor classificadi des Bombers dera Generalitat e tanben des Bombers de Barcelona participaràn en eth “X Encuentro Nacional de Rescates en Accidentes de Tráfico” que debanarà eth pròplèu mes de junh en Bilbao
Eth deluns 5 de mai comencèc era Xau Edicion deth Concors de Rescat en Accidents de Transit e eth 6au des Bombers de Barcelona que se celèbren amassa en es installacions der Institut de Seguretat Publica de Catalunya (ISPC). Enguan, eth concors unifique es rondes prealables deth concors intèrn des Bombers dera Generalitat e deth concors intèrn des Bombers der Ajuntament de Barcelona. Es manòbres acabaràn eth diuendres 9 de mai pera tarde e eth classament finau serà, independent entà cadun des dus servicis participants.
Es tres melhors equips des Bombers dera Generalitat, atau coma tanben es tres melhors des Bombers de Barcelona participaràn en eth “X Encuentro Nacional de Rescates en Accidentes de Tráfico” que debanarà eth pròplèu mes de junh en Bilbao
I an inscriti 20 equips des Bombers dera Generalitat, entre es quaus i a er equip des Pompièrs d’Aran, e 15 des Bombers de Barcelona.
Es equips, formadi per 6 pompièrs (1 comandament, 1 sanitari e 4 pompièrs, ath delà d’ua resèrva), auràn de realizar ua manòbra complèxa. Es pompièrs an de rescatar dues persones atrapades en interior d’un veïcul. Un des herits presente risc vitau imminent e eth dusau herit se mantierie estable.
Er equip des Pompièrs d’Aran participèc eth dimars, dia 6 de mai, damb un bon exercici de trenta menutes. Er equip lo formauen:
– Comandament: Manel Enseñat Beso
– Sanitària: Maria Vilches Caubet
– Tecnicians: Alejandro Orna Ara
Héctor Cardet Ezquerra
Jordi López Padilla
Javier Cavero Saez
Angel Medan García
Es concorsi, ath delà d’ua competicion, ei eth marc ideau entà implementar es naui procediments d’intervencion en accidents de transit e entà dinamizar professionaument era accion e fomentar er escambi de tecniques e metodologies de trabalh. Aguesta activitat s’a convertit en un esturment formatiu complementari ath ventalh de corsi especifics aufridi des dera Escòla de Bombers e Proteccion Civiu de Catalunya as corsi de bombers.
Eth Xau Concors de Rescat en Accidents de Transit e 6au des Bombers de Barcelona son organizadi peth Còs de Bombers dera Generalitat amassa damb es Bombers de Barcelona e era Escòla de Bombers e Proteccion Civiu der ISPC.
Era edicion, coma cada an, ei organizada damb era collaboracion dera Asociación Profesional de Rescates en Accidentes de Tráfico (APRAT) que i apòrte es jutges e es critèris d’avaloracion. Ath delà, tanben compde damb era collaboracion des empreses Lukas, Holmatro, Weber e Hilti e damb eth patrocini dera Fondacion Mutual Conductors e d’Abertis.
Eth dia 9 pera tarde, aurà lòc er acte de liurament de prèmis ena sala polivalenta der ISPC, dera man dera sua directora, Núria Aymerich, deth director deth Servei Català de Trànsit, Joan Josep Isern, deth sosdirector generau operatiu dera DGPEIS, Albert Vilanova, e deth director deth Servei de Prevenció i Extinció d’Incendis i Salvament (SPEIS) de Bombers de Barcelona, Manel Pardo.
Eth classament finau serà independent entre es dus còssi d’emergéncia e seràn premiadi es tres prumèrs equips deth classament generau, eth melhor comandament, era melhor atencion sanitària e ath melhor equip tecnic.