• Aguest congrès de lauegi ei eth mès important deth mon e se celèbre de manèra biannau e alterna entre Canadà, es Estats Units e Euròpa.
A començaments d’aguest mes d’octobre, es tres tecnics deth Centre de Lauegi deth Conselh Generau d’Aran: Jordi Gavaldà, Ivan Moner e Montse Bacardit, assistiren ar International Snow Science Workshop, eth congrès de lauegi mès important deth mon, que se celèbre de manèra biannau e alterna entre Canadà, es Estats Units e Euròpa.
En aguesta escadença era sedença escuelhuda siguec Breckenridge, un centre d’esquí enes montanhes de Colorado e eth numerò d’assistents superaue es 1.100, damb lèu de 100 ponéncies, mès de 200 pòsters, taules redones, visites sus eth terren e eveniments sociaus ath long de tota ua setmana.
Era idia d’aguest congrès ei amassar teoria e practica, de sòrta qu’es tèmes tractadi son tostemp de recèrca aplicada, e es assistents scientifics dera nhèu e professionaus restacadi damb era matèria: des de responsables de seguretat de lauegi en estacions d’esquí a tecnics de carretères, en tot passar per predictors publics e guides d’eliesquí.
Es tecnics deth Conselh presentèren es sues experiéncies en tres pòsters, restacadi damb era caracterizacion des lauegi que causen accidents enes Pirenèus, era prevision de lauegi ena carretèra deth pòrt dera Bonaigua e er efècte des povàsi deth Sahara ena estabilitat dera nhèu. Era experiéncia a de perméter melhorar eth servici de gestion deth perilh de lauegi qu’eth Conselh Generau d’Aran gerís dirèctaments des der an 2004.
En paraules deth sindic d’Aran, Carlos Barrera “se considère ath Centre de Lauegi d’Aran coma un des melhors servicis de lauegi d’Euròpa e atau sigueren presentadi en totes es reünions e conferéncies deth congrès”.
Vielha, 22 d’octobre de 2016
Conselh Generau d’Aran: Núria Sanjuan
Hònt: Centre de Lauegi d’Aran