Vielha, 9 de març de 2018.- Eth Grop de Rescat de Montanha (GRM) dera Val d’Aran, a realizat ua naua jornada de formacion e practica de rescat en lauegi de montanha en collaboracion damb Baqueira Beret.

Era jornada a combinat es aspèctes teorics damb era jornada practica a on an participat unitats deth GRM Pompièrs d’Aran, Centre de Prediccion de Lauegi deth Conselh Generau d’Aran, pisters de Baqueira-Beret, Agents de Mossos d’Esquadra, Agents de Miei Ambient, Agents Forestaus, Guides de Montanha, Agents dera Gendarmerie francesa, de CRS de Luchon, e dera Guardia Civil.

Era jornada a consistit ena coordinacion des diuèrsi grops qu’actuen en un scenari de multiples victimes en cas de laueg, dera transferéncia d’informacion e des diuèrses fases deth rescat: avís der accident, accion der operatiu, recèrca, rescat organizat e tractament des possibles victimes.

Era session a finalizat damb era metuda en practica deth rescat d’un laueg damb multiples victimes sus eth terren.

Ena practica, damb 7 victimes per laueg, eth responsable deth GRM Val d’Aran, Juanmi Riu, expliquèc que s’an utilizat toti es metòdes de recèrca deuant un accident provocat per un laueg, atau coma es diuèrsi tractaments dera atencion sanitària as victimes, en tot simular ath delà des diuèrsesi modèls d’evacuacion damb elicoptèr medicalizat, damb grua o damb elicoptèr dera enterpresa Habock.