Vielha, 23 d’agost de 2018.- Era plantilha e eth còs tecnic deth Movistar Estudiantes an estat arrecebudi pera conselhèra de Torisme e Desvolopament Economic d’Aran, Anna Díaz, en Conselh Generau d’Aran.

Eth Movistar Estudiantes, equipa dera liga ACB de basquetbòl, ei concentrat ena Val d’Aran a compdar deth dia 19 d’agost, a on realize un stage de preparacion entara pròplèu sason.

Er entrenador Josep Maria Berrocal compde damb toti es jogadors dera prumèra plantilha e 5 restacadi que realizen era pretemporada. En totau, 16 jogadors que perfeccionen eth sòn estat de forma enes installacions esportiues de Vielha e Mijaran.

Anna Díaz, a arregraït qu’un còp mès ath Movistar Estudiantes age escuelhut era Val d’Aran entà realizar eth sòn stage de pretemporada e les a desirat fòrça èxits entad aguesta pròplèu sason.

Dempús dera sua estada ena Val d’Aran, Estudiantes jogarà eth prumèr amistós dera pretemporada aguest diuendres 24 d’agost en Sant Julià de Vilatorta. Eth Mega Bemax sèrbi serà eth sòn prumèr rivau.

Eth Baskonia Basket prenerà eth relèu e harà eth stage de preparacion ena Val d’Aran deth 24 ath 30 d’agost. Cap arrebrembar qu’eth Baskonia Basket tornarà a concórrer ena Euroliga, ena qu’a jogat 6 còps era Finau Four.

En aguest sens era conselhèra, Anna Díaz, destaquèc qu’eth Conselh Generau d’Aran assumís tota era despensa dera preséncia d’aguestes equipes dera liga ACB ena Val d’Aran.