Vielha, 10 de març de 2017.- Era Val d’Aran serà presenta ena Copa d’Espanha Ciudad Real 2017 de Fotbòl Sala, que se celèbre enquiath dimenge 12 de març, damb eth lèma “Val d’Aran, era esséncia des Pirenèus”.
Era Copa d’Espanha de Fotbòl Sala ei eth torneg mès atractiu dera sason e que mès expectacion lhèue. Era Copa d’Espanha poderà veder-se en 40 païsi.
Television Espanhòla emeterà integralaments a trauès deth canau Teledeporte es 7 partits deth torneg. Eurosport tanben realizarà ua grana cobertura, en tot eméter un partit per dia a trauès deth canau Eurosport 2, atau coma Esport3 que tanben emeterà partidi en dirècte.
Se calcule qu’es audiéncies previstes aproximades solet en Espanha, pòt èster superior as 4 milions d’espectadors.
Era conselhèra de Torisme deth Conselh Generau d’Aran, Anna Díaz, a arrebrembat que fòrça equipes de prumèr nivèu de Fotbòl Sala espanhòla ja hè ans qu’escuelhen era Val d’Aran entàs sòns stages d’estiu, a on tròben es condicions e installacions esportiues de besonh entà amiar a tèrme era preparacion dera sason. Ad açò cau ahíger era apòsta deth Govèrn d’Aran entà celebrar eveniments esportius de prumèr orde mondiau coma era etapa deth Tour de França deth darrèr ostiu, que contribuïssen ara promocion dera Val d’Aran tanben coma destinacion toristica esportiua dehòra dera sason d’esquí.
