Era equipa filiau de Barcelona ei eth prumèr an que realize eth sòn stage ena Val d’Aran e s’entrene en camp de fotbòl de Naut Aran

Era Val d’Aran pòrte bèri ans en tot arrecéber era visita de diferentes equipes esportius d’elèit pendent era sason d’ostiu, entre eri eth prumèr equip blanc e blu

Era conselhèra de Torisme, Comèrç e Consum d’Aran, Anna Díaz, e er alcalde de Vielha e Mijaran, Álex Moga, an arrecebut ara plantilha deth filiau deth RCD Espanyol que se trapen ena Val d’Aran pendent aguesta setmana entà realizar part dera sua pretemporada d’ostiu.

Era equipa catalan ei eth prumèr an que realize ena Val d’Aran eth sòn stage, en tot lotjar-se en Vielha e entrenar en camp de fotbòl de Naut Aran. Des deth club son satisfèti pes condicions qu’aufrís era Val d’Aran a nivèu d’installacions entà poder desvolopar era sua pretemporada.

Es membres deth filiau non an dobtat en jogar a fotbòl ues menutes damb uns grop de mainatges dera Val d’Aran que s’an apropat ara sedença deth govèrn aranés entà veir e saludar ar equip blanc e blu.

“Ei un aunor poder compdar damb era preséncia deth filiau deth RCD Espanyol de Barcelona ena Val d’Aran. Mos alegram que mos agen escuelhut entà començar a premanir era sua sason”, comente era conselhèra de Torisme, Comèrç e Consum, Anna Diaz.

Era seccion femenina deth RCD Espanyol tanben tornarà enguan a hèr eth stage de pretemporada ena Val d’Aran coma ja hesse est an passat. Eth concrèt, deth 10 ath 12 d’agost.

Era Val d’Aran s’a anat plaçant enes darrèri ans coma era destinacion preferida per diuèrses equipes d’elèit de diferenti espòrts entà realizar part dera sua preparacion fisica mesi abans de començar era sason.