• Se balhe atau responsa ara demana qu’era sindica d’Aran, es presidéncies des Deputacions de Lleida e Huesca e es presidéncies des comarques dera Ribagorça catalana e aragonesa, héren ath secretari d’infraestructures der Estat ena sua entrevista de hè tres mesi, ena qué, gràcies ara collaboracion deth secretari generau entath Rèpte Demografic, Paco Boya, artenheren eth compromís deth Ministèri entara creacion d’un calendari conjunt d’actuacions e projèctes de melhora entara N-230

• Era passada setmana, eth Ministèri dèc eth prumèr pas entara redaccion deth projècte de condicionament dera N-230, en tot convertir-la en ua carretèra 2+1 en tram entre Benabarre e Sopeira, damb un tresau carril que melhorarà fòrça era seguretat des usatgèrs que transiten era via

• Aguesti trabalhs se higen ath compromís qu’era Generalitat de Catalunya prenec damb eth Conselh Generau d’Aran tara melhora dera C-28 damb er impuls dera Agenda dera Mobilitat Sostenibla dera Val d’Aran

Eth passat mes de març, era sindica d’Aran, Maria Vergés, es presidents des deputacions de Huesca e Lleida, Miguel Gracia e Joan Talarn, e es presidents des comarques dera Ribargoça catalana, Mª José Erta, e aragonesa, Marcel Iglesias, mantengueren ua trobada de trabalh damb eth Secretari Generau d’Infraestructures der Estat, Xavier Flores, ena s’acordèc per part deth Ministèri de Transpòrts, Mobilitat e Agenda Urbana, dessenhar un calendari conjunt d’actuacions e projèctes a amiar a tèrme.

Tres mesi dempús, eth Ministèri a anonciat dejà un contracte de servicis entara redaccion deth projècte de condicionament dera N-230 damb trams de tres carrils (carretèra 2+1), concrètaments entre es poblacions de Benabarre e Sopeira, çò que supausarà un auanç importantíssim ena seguretat vial des usatgèrs d’aguesta carretèra. Er anonci dera licitacion se pòt trapar dejà en BOE.

Era sindica a mostrat “era satisfaccion deth Conselh Generau d’Aran deuant aguesta importanta melhora que respon ara reclamacion que transmeterem ath secretari generau eth passat mes de març” e a auançat que: “deth govèrn d’Aran ençà contunharam trabalhant entà qu’aguesta via esdevengue segura entàs usatgèrs” e higie que “aguesti trabalhs se higen as qu’auem iniciat tanben damb era Generalitat de Catalunya en tot arténher eth sòn  compromís tar impuls dera Agenda de Mobilitat Sostenibla d’Aran e tara melhora dera C-28, barrant atau eth cercle tà qu’era Val d’Aran transite entà ua mobilitat sostenibla adaptada as besonhs e cambis qu’arriben”.

Atau madeish, era sindica a volut “arregraïr era bona predisposicion deth Secretari Generau, que coneish ben era nòsta realitat, entà elevar es demanes dera Val d’Aran e es comarques afectades ath govèrn en aguest ahèr”.