1. Passi entà realizar era sollicitud/comunicacion d’activitats damb risc d’incendi forestau
- Consultar eth Plan Alfa entath dia que se vò realizar era activitat.
- Ramplir e signar eth formulari.
- Enviar eth formulari mejançant era Sedensa electronica deth Conselh Generau d’Aran.
2. Comunicacion d’activitats damb risc d’incendi forestau
2.1 Activitats autorizades mejançant era comunicacion e era declaracion responsabla ath Departament de Territòri, Paisatge e Cambi Climatic:
▪ Crema de rèstes vegetaus de dimensions redusides (<6 m³) entara prevencion d’incendis forestaus.
▪ Utilizar buhaders o semblants en òbres pròp de terrens forestaus.
2.2 Activitats que requerissen autorizacion expressa deth Departament de Territòri, Paisatge e Cambi Climatic
Ei de besonh era autorizacion excepcionau deth Conselhèr competent en matèria de Miei Ambient, damb informe prealable des Agents de Miei Ambient deth Conselh Generau d’Aran:
- Crèma de rèstes agricòles o silvicòles
- Crèma de rèstes vegetaus de dimensions miejanes (>6 m³) entara prevencion d’incendis forestaus
- Lançament de coets, globus o auti artefactes damb huec
3. Condicionants segontes eth Plan Alfa
Eth Plan Alfa, establit peth Còs d’Agents Ruraus, determine diariament eth nivèu de perilh d’incendi forestau e es restriccions associades as activitats damb risc.
Aguest sistèma establís disparièrs nivèus (de 0 a 4), que pòden comportar limitacions o proïbicions addicionaus:
- Nivèu 0 e 1 (perilh baish o moderat): se pòden realizar activitats damb risc d’incendi, tostemps que se complisquen es condicions establides ena normativa vigenta e enes autorizacions o comunicacions corresponentes.
- Nivèu 2 (perilh naut): es activitats damb risc pòden èster restringides o condicionades, podent-se suspéner determinades activitats coma crèmes o usatge de huec.
- Nivèu 3 (perilh fòrça naut): demoren suspenudes totes es activitats damb risc d’incendi, includides es prèviament autorizades o comunicades.
- Nivèu 4 (perilh extrèm): s’apliquen mesures extraordinàries, inclodint restriccions d’accès ath miei naturau e limitacions generalizades des activitats.
En tot cas, era realizacion d’activitats damb huec demore condicionada ath nivèu diari vigent deth Plan Alfa. En cas de contradiccion, prevaleràn es restriccions establides peth Plan Alfa e es indicacions que poguen realizar es Agents de Miei Ambient deth Conselh Generau d’Aran.
4. Normativa de referéncia
Es activitats damb risc d’incendi an d’èster comunicades o autorizades peth Departament de Territòri, Paisatge e Cambi Climatic deth Conselh Generau d’Aran, d’acòrd damb eth Reglament entà regular era gestion sostenible deth huec en terren forestau e interfase urbana en territòri d’Aran, en foncion dera distància ara massa forestau, eth volum des rèstes vegetaus, eth periòde d’execucion e eth tipe d’activitat.
Damb era entrada en vigor dera Lei 7/2022, de 8 d’abriu, de residus e sòls contaminadi entà ua economia circular (BOE num. 85, de 9 d’abriu de 2022), se proïbís damb caractèr generau era crema de rèstes vegetaus (forestaus, agricòles o de jardineria). Totun, aguesta practica ei permetuda en cas de microexplotacions e petites explotacions agràries, ei a díder, aqueres subjèctes ara Declaracion Unica Agrària (DUN) o inscrites ath Registre d’Operadors Professionals de Vegetaus (ROPVEG).
Maugrat aguesta proïbicion generau, s’amplie era possibilitat de crèma en determinadi supòsits restacadi damb era prevencion d’incendis forestaus. En concret, se permet era crema de rèstes forestaus lenhoses (abituaument procedentes d’esporgues), damb independéncia dera existéncia d’activitat agrària professionau, tostemp que se realize en terrens plaçadi laguens dera zòna d’influéncia forestau.
En çò que tanh ath encastre d’aplicacion, aguest includís tant es terrens forestaus coma era sua zòna d’influéncia. Aguesta zòna se definís coma era franja de 400 mètres contigua as terrenhs forestaus.
Fin finau, d’acòrd damb es caracteristiques orografiques e forestaus dera Val d’Aran, aguesta zòna d’influéncia afècte era practica totalitat deth territòri, ja que non existissen punts plaçadi a mès de 400 mètres de terrens forestaus.