Era ciutat de Granada acuelhie peth prumèr còp ena sua istòria, era celebracion d’un campionat d’Espanha de patinatge artistic sus gèu, en madeish recinte en quau d’ací a uns mesi, se desvoloparà era Universiada 2015.

Ena categoria sènior participèc eth bicampion d’Euròpa, eth madrilenh Javier Fernández, qui era setmana anteriora auie participat ena Finau deth Gran Prix celebrada en Barcelona e en tot arténher era dusau posicion.

Ena categoria junior a on participaue eth nòste patinador aranés, Tòn Cónsul, se produsic era competicion mès barrada. Non s’arrebrembaue un Nacionau damb tant nivèu eth júnior masculin, e ei qu’es quate patinadors top, Aleix Gabara, Tón Cónsul, Héctor Alonso e Ernesto Martínez dèren un gran espectacle en tot lutar pes posicions de pòdi.

Tòn, dempús deth prumèr dia de competicion, damb un programa quasi perfècte artenhec era dusau posicion provisionau deth campionat, deth temps qu’eth favorit d’aguest campionat Hèctor Alonso demoraue en quatau lòc provisionau.

Dempús dera dusau e definitiva jornada, Cónsul, assolidèc er argent que non li podec arrincar eth patinador madrilenh, Héctor Alonso, eth quau remontèc ua posicion per çò qu’ei dera prumèra jornada.

Artenhec eth campionat, eth patinador deth FCB Barcelona, Aleix Gabara, que dempús d’un error ar inici deth programa, se mostrèc intractable en tot mantier era prumèra posicion deth prumèr dia.

Toti dus patinadors tornaràn a veder-se es cares pròperament en Campionat de Catalonha que debanarà ena Val d’Aran (Palai de Gèu de Vielha), es pròplèus 17 e 18 de gèr.