• Eth Conselh Generau d’Aran sollicitèc ath Departament d’Educacion dera Generalitat de Catalunya qu’aguestes pròves s’amièssen a tèrme en Aran, atau e coma s’artenhec damb es pròves de selectivitat, en tot esvitar eth desplaçament der escolanat aranés entà Lhèida.

Era Val d’Aran a acuelhut aguesta setmana es pròves deth Bachibac que, per prumèr viatge, s’amièren a tèrme en nòste territòri en tot perméter ar escolanat der Institut d’Aran e tanben deth Pallars Jussà evitar eth desplaçament tà Lhèida, hèt que supause ua despena importanta tàs familhes.

Entara conselhèra de coneishement Angelina Cases: “Volem facilitar ar escolanat e as sues familhes era tranquillitat de non auer-se de desplaçar dehòra d’Aran”. Higie “Ei ua iniciativa importanta trabalhada des deth govèrn d’Aran que se hig ara des pròves PAU (d’accès ara universitat) que se hèn en Aran der an 2021 ençà, e evitar atau es desplaçaments de dus dies tà Lhèida, damb çò que supòse tara economia familiara”.

Enguan s’an examinat un totau de 14 alumnes, 9 der Institut d’Aran e 5 dera Pobla de Segur. Pendent dus dies es alumnes s’an examinat de lengua e literatura e d’istòria de França e Espanha.

Eth Bachibac ei un programa educatiu que permet as estudiants de bachelierat obtier de manèra simultanèa dus títols de segondària: eth titòl de Bachelierat espanhòu e eth de Baccalauréat francés. Aguest programa ei orientat a alumnes que vòlen apregondir ena sua formacion en lengua e cultura francesa e les premanís entà accedir ara universitat tant en Espanha com en França.

Vielha, 04 de mai 2025