• Deth 16 ath 18 de mai s’aufriràn activitats gratuïtes tà toti es publics: exposicions, musica en dirècte, guidatges e ua charrada inedita

Coma cada an, eth hilat de Musèus dera Val d’Aran s’a hijut ara iniciativa der ICOM (International Council of Museums), qu’a compdar de 1977 organize eth Dia Internacionau des Musèus e promò qu’es musèus organizen activitats ath torn deth 18 de mai (Dia Internacionau des Musèus). Enguan, eth lèma prepausat entara comunitat museïstica internacionau ei: “Eth futur des musèus en comunitats en cambi constant”. A compdar d’aguesta prepausa, eth Musèu dera Val d’Aran meterà en valor era adaptacion des musèus enes comunitats, damb naui publics, naues dinamiques e naues aportacions de coneishement. Aguestes activitats auràn en comun era tematica d’enguan enes musèus d’Aran: es viatges.

Entre es activitats de nau format cau remercar ua visita guidada a cargue dera Associacion de Discapacitats d’Aran (ADDA), eth diuendres 16, tàs 11 ores, en Musèu dera Val d’Aran. Es usatgèrs deth centre seràn es encargats d’explicar era preistòria, damb un scenari e materiau didactic hèt en sòn centre.

Ua auta des nauetats se presente damb eth títol “Un piano en Musèu. Un viatge a 4 compassi per 4 òbres confinades”. Eth pianista e compositor Guillem S. Benet interpretarà pèces musicaus inspirades en diuèrses ciutats deth mon. Entre es cançons, se mostrarà e explicarà ua seleccion d’òbres restacades damb es viatges, qu’abituauments se tròben ena resèrva deth musèu. Aguesta activitat serà era protagonista dera Net des Musèus, dissabte 17, tàs 19 ores. Pendent aquera serada, eth musèu serà dubert enquias 23 ores.

Era fotografia aurà un lòc important, damb dues activitats. En Ecomusèu çò de Joanchiquet de Vilamòs, eth diuendres 16, tàs 18 ores, s’inaugurarà era exposicion deth fotograf Marçal Ruiz i Giralt: “On la llum fa camí”. A trauès d’ua vintea de fotografies, era lum mos amiarà per camins, rius e bòsqui des Pirenèus. Aguesta mòstra se poirà visitar enquiar ostiu.

Era programacion se barrarà damb ua charrada dinamizada per Ramon Barnadas, expèrt en fotografia istorica. Parlarà dera sua darrèra recèrca sus era fotografia amateur deth sègle XIX e de com era Val d’Aran tanben siguec immortalizada per viatgèrs d’aquera epòca. Pendent era presentacion, se contextualizarà era produccion de fotografies damb es tecniques fotografiques deth moment, damb materiau d’epòca e ua demostracion de quimica fotografica.

Es activitats son gratuïtes e sense resèrva. Es musèus se poiràn visitar gratuïtament es dies 17 e 18 de mai.

Entà mès informacion e consultes, podetz telefonar entath 973 64 18 15.

Vielha, 14 de mai 2025