Aguest ostiu 2025 supause ua naua etapa entath léser educatiu ena Val d’Aran, eth Conselh Generau d’Aran realize ua programacion pròpria d’activitats de léser d’ostiu entara mainadèra e joenessa de 4 a 35 ans, qu’ei itineranta pes municipis deth territòri.

Un triple programa: “Suenha-te: Temps entà tu”, “Connexion Joena” e “Joenessa +”, era iniciatiua vò incorporar era igualtat d’oportunitats e qu’et léser sigue accesible entà toti.

“Suenha-te: Temps entà tu” ei pensat entà mainadèra de 4 a 11 ans e aufrís talhèrs creatius, jòcs esportius, activitats d’aigua, condes e dances. Se desvolòpe cada setmana en pòbles diferents coma Garòs, Vielha, Bossòst e Les, damb acompanhament enes linhes de transpòrt public entà garantir qu’eth léser arribe a tota era mainadèra deth territòri.

“Connexion Joena”, entara joenessa de 12 a 18 ans, prepause activitats qu’amassen era natura, era tecnologia, era creacion e era convivéncia. Un des punts màgers ei eth projècte CodiCrack, un talhèr de competéncies digitaus reconeishut pera Universitat Politècnica de Catalunya (UPC), que permet trabalhar abilitats entà mòir-se damb seguretat e esperit critic en mon digitau. Ath delà, se haràn activitats com rafting, via ferrata, piscina, talhèrs de codina, estampacion, acampada e gimcanes.

Entara joenessa de 18 a 35 ans, “Joenessa +” includís talhèrs de creacion com era elaboracion de candeles, estampacion de tote bags e ceramica, damb sessions en Vielha, Bossòst e Salardú. Ua auta manèra de mantier actiu eth léser tanben ena etapa adulta joena.

Ath delà d’aguesta programacion pròpria, coma cada an, eth Conselh Generau d’Aran a hèt publica tanben era guida damb era informacion sus es activitats entara mainadèra organizades per entitats, associacions e empreses deth territòri, que compde damb ua grana varietat de prepauses de léser e formacion.

Aguest projècte a estat possible gràcies ath trabalh conjunt de diuèrsi servicis vinculats ara atencion sociau ena Val d’Aran: eth Servici d’Intervencion Socioeducativa, era Oficina de Joenessa e eth Servici Audèth de Huec, damb eth supòrt deth Departament d’Igualtat e Feminismes e deth Departament de Drets Sociaus e Inclusion dera Generalitat de Catalunya.

Tanben s’a compdat damb era collaboracion de toti es ajuntaments a on se desvolòpen es activitats, hèt que a permetut apropar es propostes a tot eth territòri dera Val d’Aran.

Totes es activitats deth Conselh son gratuïtes, subvencionades e damb places limitades. Entà participar, cau hèr era inscripcion prèvia.

Des deth Conselh Generau d’Aran, damb aguest projècte, se vò garantir qu’era mainadèra e era joenessa aranesa agen era possibilitat de gaudir d’un ostiu actiu, educatiu e divertit, en tot eth territòri.

Entà mès informacion e inscripcions:
📧 joenessa@aran.org
📞 973 640625 – 680 415 451
📍 Oficina de Joenessa – C/Major, 36 (Vielha)
🕘 Orari d’atencion: de 9 a 15 ores

Vielha, 21 de junh 2025