• Eth vicesindic tresau e conselhèr d’Espòrts e eth conselhèr de Torisme, Promocion Economica, Comèrç e Mobilitat, dera maxima institucion aranesa presentauen en Madrid, ena sedença de Baqueira , es accions previstes per part deth govèrn d’Aran entara tempsada toristica d’ostiu.

Eth Govèrn d’Aran, a trauès der Airau de Torisme deth Conselh Generau d’Aran (Foment Torisme Val d’Aran) a presentat es activitats programades entad aguest ostiu, entre es quaus cau remercar eth senderisme, damb mès de cinc cents quilomètres de rotes senhalizades entà toti es nivèus, quate entrades tath Parc Nacionau d’Aigüestòrtes e Estanh de Sant Maurici o es GR 11 per Catalonha e GR 10 a trauès de França. Tanben, tucs de nauta montanha, en quauqui casi de mès de tres mil mètres de desnivèu, ath delà de granes rotes itinerantes, com eth Camin Reiau. Tanben se presentauen es onze eveniments esportius, de running e ciclisme qu’eth territòri aranés acuelherà aguest ostiu.

Se hec mencion ath reconeishement d’Aran coma Resèrva dera Biosfèra dera UNESCO, un reconeishement que distingís ath territòri pera sua apòsta de conciliacion e equilibri entre eth desvolopament economic-sostenible e era conservacion deth sòn entorn.

Ena presentacion s’incidie ena campanha de sensibilizacion de camins compartits tath desvolopament d’un creishement sostenible entà fomentar es bones practiques e eth respècte en zònes de montanha, passejades en bicicleta damb senhaus de seguiment entà totes es categories, a trauès dera aplicacion Guidaran, en tot respectar eth mèdi ambient e era convivéncia entre toti es sòns usatgèrs. Ues accions includides en desvolopament deth Plan de Sostenibilitat Toristica qu’eth Govèrn d’Aran amie a tèrme gràcies a ua ajuda der Estat.

Es visitaires tanben poiràn practicar espòrts d’aventura, vies herrades, rafting o escalada, ath delà d’excursions guidades damb buggies e mòtos electriques, sense deishar de costat era gastronomia.

Disposaràn de servicis  de garantia d’accessibilitat des bicicletes en lotjaments adaptadi ad aguesta practica esportiva damb era aplicacion de consulta ÒcBike.

Entath vicesindic tresau d’Aran e conselhèr d’Espòrts, Javier Cavero: “era Val d’Aran a fòrça tà aufrir aguesta tempsada d’ostiu, a on cau remercar, ath delà dera riquesa deth nòste patrimòni, gastronomia e tradicions, eveniments esportius de prumèr, que mos placen coma referents a nivèu mondiau.” E higie que: “eth Govèrn d’Aran manten ua estrèta collaboracion autant damb Baqueira Beret com damb es organizadors de corses esportives, entre d’auti actors, entà impulsar eth nòste territòri toristicament e hè’c d’ua manèra sostenibla e responsabla”.

Tath conselhèr de Torisme, Promocion Economica, Comèrç e Mobilitat, Josep Canut: “aguest ostiu incorporam ena nòsta aufèrta nauetats restacades damb es rotes tematiques de senderisme “Eres en Vilamòs, Aran Sauvatge en Bossòst e Castèth de Les”, es panèus indicadors de Camins compartits e era installacion de supòrts selfies en nau endrets emblematics dera Val d’Aran o era aplicacion que milhore era accessibilitat e es servicis en entorn naturau en tot respectar-ne eth sòn usatge”.

En acte de presentacion i assistiren eth director comerciau de Baqueira Beret, Javier Ubeira e eth director de Hoka Val d’Aran by UTMB, Xavi Pocino en ua presentacion que compdèc damb ua vintia de jornalistes de mieis de comunicacion.

Cau rebrembar qu’eth Conselh Generau d’Aran collabòre damb Baqueria Beret en matèria de promocion toristica damb diuèrses accions, entre eres er impuls des sues oficines en Madrid e Tolosa (França).

Vielha, 26 de junh de 2025