Deth 23 enquiath 26 de junh s’a hèt era 22au Assemblada Generau des Servicis Europèus de Prediccion de Lauegi (EAWS) en castèth de Seggau, Steiermark, Àustria. Eth Centre de Lauegi ei membre dera EAWS des deth son començament. EAWS ei er espaci de trabalh a on es servicis de prediccion europèus se tròben entà actualizar e milhorar de manèra consensuada es airines e estandards des bulletins de lauegi publics a escala regionau e tanben es prediccions especifiques per endrets coma carretères.

Eth trabalh se desvolòpe en cicles de dus ans de durada laguens de grops de trabalh formats per representants des centres membres, e es naues prepauses an d’èster votades e aprovades ena Assemblada Generau per aumens dus tèrci de toti es membres.

Aguest còp s’an presentat e votat es resultats e prepauses des grops de trabalh sus era actualizacion dera escala de perilh de lauegi, era matritz EAWS, recomanacions dera ora e validitat deth bulletin, paramètres que se remassen ena basa de dades de fatalitats per laueg, finançament e estructura organizativa des EAWS. Tanben s’an aprovat naui grops de trabalh e es persones trigades que representaràn es figures de director, coordinador, comitat tecnic assessor e grops de trabalh des EAWS pendent eth nau cicle de dus ans.

Era tecnica-nivològa deth Conselh Generau, Montse Bacardit, a representat ath Centre de Lauegi en tot exercir eth vòt des ahèrs tractadi. Ath madeish temps, era assisténcia en aguesta amassada a significat ua oportunitat entà refortir es relacions e collaboracions entre es centres de prediccion.

Era següenta Assemblada Generau se harà deth 14 ath 17 de junh deth 2027 en Zakopane, Polonha.

Vielha, 4 de junhsèga de 2025