• Era plaça d’Aran acuelhec aguesta jornada hestiua, organizada peth collectiu Lengua Viua, en reivindicacion der usatge der aranés.

Era Val d’Aran tornèc a víuer ager ua naua edicion, era 31au, dera corsa organizada peth collectiu Lengua Viua, que cada an amasse a persones de toti es parçans deth país entà deféner e hèr visibla era lengua pròpria d’Aran.

Era jornada comencèc damb es diferentes gessudes de Les, Montgarri, es Banhs de Tredòs e eth Pòrt de Vielha, entà convergir en Vielha, a on era plaça d’Aran acuelhec era hèsta finau damb es tradicionaus actes simbolics e de reconeishença.

Se liurèc eth prèmi ath dessenh dera samarreta commemorativa d’enguan, que siguec tà Maria Puyol e s’autregèc eth prèmi Lengua Viua a André Ricard, escultor dera pèça que presidís era plaça, e tanben autor dera celèbra tèda des Jòcs Olimpics de Barcelona 1992.

Eth collectiu Lengua Viua volec “remercar, un còp mès, eth besonh urgent d’aumentar er emplec sociau der aranés”, e reclamèc ua “preséncia reau e efectiva dera lengua ena vida vidanta, tant en espaci public com en privat, a despiet dera sua condicion de lengua veïculara en ensenhament”.

Fin finau eth grop occitan Nadau, animèc era serada damb un repertòri en defensa dera cultura e era lengua occitana.

Vielha, 28 de junhsèga 2025