- Pendent era session extraordinària deth Plen dera maxima insitucion aranesa tanben s’a aprovat era modificacion de crèdit pressupostària damb es vòts a favor deth grup d’Unitat d’Aran e era abstencion de Convergéncia Aranesa.
Eth Plen extraodinari deth Conselh Generau d’Aran, celebrat aué ena sedença insticionau dera Casa deth Senhor d’Arròs, a aprovat per unanimitat er autrejament de distincions e mencions aunorifiques a diuèrs personau deth Còs de Pompièrs d’Aran.
Se tracte d’un totau de 16 medalhes de bronze a membres deth Còs damb 20 ans de servici efectiu, 22 medalhes d’argent tàs qu’an 25 ans de servici efectiu, 10 medalhes d’aur tàs de 35 ans de servici efectiu o, en cas excepcionau, tàs qu’an mantengut 30 ans de servici enquiath moment deth cessament dera activitat. Atau madeish, s’an aprovat 3 mencions aunorifiques a persones damb ua trajectòria destacada ena promocion e desvolopament deth servici d’emergéncies ena Val d’Aran, en àmbits coma eth rescat en montanha, era gestion deth transpòrt sanitari, e era modernizacion des infraestructures e collaboracions institucionaus.
Er autrejament d’aguestes distincions s’amiarà a tèrme pendent er acte institucionau dera hèsta de santa Barbara, eth 4 de deseme d’enguan. Es distincions seràn inscrites oficiauments en Libre de Registre d’Aunors e Distincions deth Còs de Pompièrs d’Aran.
Per ua auta part, eth Plen deth Conselh Generau d’Aran a aprovat era modificacion de crèdit deth pressupòst generau entath present exercici, damb ua dotacion totau de 1.324.523,91 €.
Aguesta modificacion permeterà, entre d’autes inversions, era reabilitacion dera Casa deth Senhor, qu’acuelh tanben er Archiu Generau d’Aran, damb 120.000€, accions de mantenement de camins e hilat viari damb 75.000€, era crompa d’equips de proteccion individuau tar airau de Pompièrs per 175.000€, eth projècte museografic deth Castèth de Les damb 100.000€ e ua transferéncia de 200.000 euros ar Ajuntament de Vielha e Mijaran entà collaborar en apraiament dera carretèra de Mont en que trabalhe aguest ajuntament, entre d’autes inversions.
Vielha, 8 d’agost 2025