• Aguesta accion ei laguens deth Plan de Sostenibilitat tath foment deth torisme qu’includís dues rotes mès en Les e Bossòst.

Eth pòble de Vilamòs acuelhec ager deluns era inauguracion dera prumèra rota tematica deth Baish Aran, dedicada as oficis tradicionaus des hemnes jos eth nòm “Eres”. Aguesta accion forme part deth projècte impulsat peth Conselh Generau d’Aran, a trauès deth sòn Plan de Sostenibilitat, entà desvolopar rotes culturau-toristiques enes municipis de Vilamòs, Les e Bossòst.

Eth recorrut propòse ua visita peth casc antic e entorns de Vilamòs a trauès de supòrts explicatius e elements visuaus, un totau de ueit, que meten de relèu es oficis e ròtles tradicionaus femenins ena societat aranesa en d’auti tempsi.

Aguest itinerari ei eth prumèr des tres que se desvoloparàn ena zòna deth Baish Aran. En Les era rota “Castèth de Les, ua passejada pera Istòria d’Aran”, se centre ena istòria e s’inaugurarà aguest dimèrcles 13 d’agost, mentre qu’era de Bossòst, que pòrte eth nòm “Fauna Sauvatge“, se centre ena fauna d’Aran e s’inaugurarà eth deluns 18 d’agost.

Er acte d’inauguracion dera rota “Eres” siguec presidit pera sindica d’Aran, Maria Vergés, acompanhada peth vicesindic dusau e alcalde de Vilamòs, Oriol Sala, ath delà de d’auti conselhèrs deth Conselh Generau d’Aran.

Maria Vergés, sindica d’Aran, a destacat qu’«aguesta rota ei un exemple viu de coma podem recuperar e méter en valor er important papèr des hemnes ena nòsta istòria, en tot contribusir ath torisme culturau damb identitat pròpria».

Pera sua part, tà Oriol Sala, alcalde de Vilamòs “aguest projècte represente un motiu d’orgulh entath pòble, que met en valor era memòria collectiva e era vida des nòstes hemnes”.

Vielha, 12 d’agost de 2025