Inaugurada era rota tematica “Castèth de Les, Passejada pera Istòria d’Aran” laguens deth projècte de rotes deth Baish Aran

Eth Conselh Generau d’Aran barre atau era execucion d’aguest projècte, que contemple tres itineraris, amassa damb era de Bossòst e Vilamòs, laguens deth Plan de Sostenibilitat entara promocion deth torisme.

Eth recorrut tematic  “Castèth de Les, Passejada pera Istòria d’Aran” ” prepause ua immersion en passat medievau aranés, damb panèus informatius e supòrts visuaus que, combinats damb supòrts tecnologics en forma de còdis QR, permeten as visitaires eth seguiment e informacion dera rota conformada per 9 elements, includit eth Castèth de Pijoert.

Er acte d’inauguracion dera rota siguec presidit pera sindica d’Aran, Maria Vergés, acompanhada per alcalde Les e conselhèr, Andreu Cortés ath delà de d’auti conselhèrs deth Conselh Generau d’Aran.

Damb aguesta iniciativa, eth Conselh Generau vò promòir eth torisme culturau, sostenible e tecnologic, e contribuir ath reequilibri territoriau e a ua milhor visibilitat deth patrimòni locau damb itineraris autoguidadi de qualitat des tres rotes tematiques, impulsades peth Plan de Sostenibilitat Toristica dera Val d’Aran.

Entar alcalde de Les e conselhèr deth Conselh Generau d’Aran, Andrèu Cortés: “Aguest ei un pas mès entà dauant en compromís damb era preservacion e divulgacion deth nòste patrimòni istoric qu’encaishe perfèctament en nòste pòble, qu’amassa damb eth castèth de Pijoert e eth nòste patrimòni immateriau, com ei eth haro, amplien es nòstes prepauses culturaus e istoriques tàs nòsti visitaires”.

Entara sindica d’Aran, Maria Vergés: “Aguestes iniciatives mos permeten méter en valor eth legat, que de viatges passe inapercebut, d’ua riquesa impressionanta que mos cau suenhar, ua apòsta mès amassa damb Vilamòs e Bossòst, qu’aufrís as visitaires ua prepausa integrau e sostenibla”.