• Eth Conselh Generau d’Aran,  ei un des impulsors d’aguest projècte de Desvolopament Economic Sostenible a trauès dera Itinerància entre Refugis.

Eth projècte transfronterèr europèu DESIR (Desvolopament Economic Sostenible a trauès dera Itinerància entre Refugis) a arribat en sòn equador damb era celebracion d’ua naua amassada de seguiment ena vila occitana de Sant Bertran de Comenges (Occitània).

Dempús d’un an e miei de trajectòria, DESIR comence ara ua naua etapa centrada ena execucion des accions previstes entàs mesi que vien. Era session servie entà abordar diuèrsi encastres clau deth projècte, coma era connexion entre sendèrs transfronterèrs, es activitats mediambientaus e es trabalhs de melhora enes infrastructures des refugis de montanha.

Era amassada a compdat tanben damb era participacion de representants deth projècte POCTEFA INBIOPYR, damb eth quau DESIR establís sinèrgies entà potenciar es activitats de montanha en tot eth conjunt des Pirenèus.

Un des punts destacadi a estat era presentacion des futures capsules formatives destinades as guardes de montanha e era programacion d’activitats culturaus e mediambientaus impulsades pera REPV (Réseau d’Éducation Pyrénées Vivantes) jos eth nòm “Rendez-vous des cimes”.

Entàs propèrs mesi de 2025, s’an previsti trabalhs de melhora en refugis coma eth dera Honeria ena Val d’Aran (Conselh Generau d’Aran), Ulldeter (CEC), e ja entà 2026, se previé trabalhar en refugis dera FFCAM d’Étang Fourcat e Larribet.

DESIR forme part dera convocatòria de projèctes deth programa Interreg-POCTEFA 2021-2027, cofinançat pera Union Europèa. Er objectiu deth projècte ei melhorar era connexion, era gestion des resèrves, era promocion deth senderisme omologat entre refugis e fomentar eth coneishement des infrastructures de montanha damb guardes en toti es Pirenèus.

Eth projècte ei ua continuacion deth trabalh iniciat en ENTREPYR, que vò anar mès enlà en tèrmes de cooperacion e sostenibilitat en encastre pirenenc.

DESIR ei impulsat peth Conselh Generau d’Aran, era Federación Aragonesa de Montañismo (FAM), era Fédération Française des Clubs Alpins et de Montagne (FFCAM), Federació d’Entitats Excursionistes de Catalunya (FEEC), Centre Excursionista de Catalunya (CEC), Federación Navarra de Montaña y Escalada, NASUVINSA, Fédération Française de la Randonnée Pédestre (FFRP) e eth Govèrn d’Andòrra coma ent associat.

Era propèra amassada serà en Andòrra eth 18 de noveme d’enguan.

Vielha, 15 de seteme de 2025