• Eth Plen dera maxima institucion aranesa a aprovat aué, a propòsta deth grup d’UA, ua declaracion institucionau de supòrt e solidaritat damb Gaza en tot condemnar tanben eth genocidi que patís era sua poblacion.

• Era prepausa s’a aprovat per unanimitat damb es vòts a favor d’Unitat d’Aran (UA) e Convergéncia Democratica Aranesa (CDA), en defensa des valors de patz, democràcia e drets umans.

Eth Plen deth Conselh Generau d’Aran, amassat aué ena Casa deth Senhor d’Arròs, a aprovat per unanimitat ua declaracion de supòrt fèrm damb era populacion de Gaza, impulsada peth grup d’Unitat d’Aran, e s’a mostrat decidit a deféner es principis de democràcia, patz e drets umans fondamentaus.

En aguest contèxte, era maxima institucion aranesa a remercat que: “era societat aranesa manten un fèrm compromís damb es valors d’umanitat e solidaritat. Aguesta declaracion preten posicionar ara maxima institucion aranesa deuant deth genocidi que patís era populacion en Gaza, e a accentuat era urgéncia de cercar ua solucion pacifica e respectuosa damb es drets umans”.

Segontes era declaracion aprovada, eth Conselh Generau s’a posicionat clarament en contra de tot acte de violéncia o de guèrra, e a condemnat fèrmament es grèus abusi contra es drets umans que i a en Gaza. En aguest sens, eth Conselh a aperat ara comunitat internacionau a préner mesures urgentes entara proteccion des victimes innocentes e tà garantir er accès immediat ara ajuda umanitària ena zòna.

Era declaracion includís era peticion d’ua arturada immediata e permanenta deth huec, e tanben era liberacion sense condicions des ostatges. «Era liberacion immediata e sense condicions des persones capturades» a estat un des punts clau en qué s’a insistit, tau com s’a manifestat ena declaracion institucionau aprovada. Tanben se reafirme era importància d’assegurar un accès efectiu ara ajuda umanitària entà solatjar era grèu situacion qu’afronte era populacion civiu de Gaza.

Finaument, era declaracion met de manifèst eth compromís fèrm deth Conselh Generau a favor d’ua solucion pacifica basada ena creacion de dus estats independenti, un procès de patz que respècte era dignitat e es drets de toti es pòbles implicadi. «Afirme era sua determinacion entà cercar ua patz que perdure, basada ena solucion des dus estats», recuelh era declaracion, ua crida ara cooperacion e ath dialòg entre es pòbles e autoritats palestines e israelianes, damb eth supòrt dera comunautat internacionau.

Aguesta declaracion institucionau reafirme tanben es principis fondamentaus dera societat aranesa: solidaritat, respècte, patz, democràcia e justícia.

Era declaracion se barraue damb eth compromís per part deth Conselh Generau d’Aran: “deuant dera barbària e era desumanizacion ei clar: umanitat, respècte, solidaritat e principis. E, sustot, ara e tostemp: patz, democràcia e justícia damb es pòbles e damb es persones”.

Vielha, 19 de seteme de 2025