• Era sindica d’Aran, Maria Vergés, e era conselhèra generau d’Igualtat, Joenessa e Inclosion Sociau, Maria Menis, recebien aguest maitin a Eva Menor, conselhèra d’Igualtat e Feminisme dera Generalitat de Catalunya ena sua prumèra visita oficiau entara Val d’Aran

• Era trobada a servit entà méter de manifèst eth besonh de formalizar eth traspàs des competéncies previst ena Lei de Regim Especiau d’Aran en matèria d’igualtat e feminisme entà poder consolidar eth sistèma d’atencion as persones que desvolope eth govèrn d’Aran

Era conselhèra d’Igualtat e Feminisme dera Generalitat de Catalunya, Eva Menor, a visitat aué era Val d’Aran ena sua prumèra visita oficiau en nòste terrtiòri. Era sindica d’Aran, Maria Vergés, la recebie, amassa damb era conselhèra d’Igualtat, Joenessa e Inclusion Sociau, Maria Menis, ena sedença deth govèrn d’Aran.

Pendent aguesta visita s’a mantengut taben ua amassada de caractèr tecnic damb era Directora deth Servici Aranés de Benèster e Salut a on s’a explicat quines son es accions qu’actuauments amie a tèrme eth Conselh Generau d’Aran n’aguesta matèria e que formen part de tota era rèsta de trabalhs que, de manèra transersau, se desvolopen en àmbit sociau e d’atencion as persones, coma pòden èster es programes “Suenha-te”, “Connexion joena”, “En familha” e totes es atencions personalizades en encastre dera igualtat e collectiu LGTBIQ+.

Era Lei  d’Aran establís es competéncies pròpries deth Conselh en matèria de proteccion des persones e des familhes, perspectiva de genre, coesion sociau e benèster. Maugrat qu’eth Conselh Generau a metut ja en practica diuèrses accions en aguestes matèries, eth traspàs oficiau des competéncies encara non s’a formalizat.  Era Sindica a hèt arribar eth besonh d’activar es mecanismes entà formalizar aguest traspàs coma pas imprescindible entà exercir de forma plea e eficaç es foncions que se li reconeishen a Aran.

Ua auta qüestion qu’eth govèrn d’Aran a plantejat ena amassada a estat eth besonh de definir çò qu’a d’èster eth “Punt de Trobada de Familhes” qu’a coma objectiu normalizar er exercici des drets de comunicacion des menors damb es sòns progenitors e familhars, un servici damb eth qu’actuauments era Val d’Aran non compde.

Era Sindica d’Aran a volut “arregraïr era visita dera conselhèra e era su predisposicion entà amiar a tèrme aguestes prepauses que li auem presentat, autant per çò que hè ar encastre competenciau com ath mès tecnic, que mos a de perméter dar un saut qualitatiu important ena atencion as persones en Aran.”

Vielha, 24 de seteme de 2025