- Er eveniment, qu’aurà lòc es dies 27 e 28 de noveme de 2025, a ua perspectiva academica e de divulgacion.
- Eth Conselh Generau d’Aran,era Universitat Pompeu Fabra e RTVE organizen aguest congrès damb era collaboracion dera Universitat de Lleida e era Generalitat de Catalunya e era Secretaria Generau deth Rèpte Demografic, entre d’auti.
Eth Conselh Generau d’Aran, eth Departament de Comunicacion dera Universitat Pompeu Fabra, damb eth Grop de Recèrca en Comunicacion Politica, Jornalisme e Democràcia POLCOM-GRP, e RTVE organizen eth Prumèr Congrès Internacionau sus Comunicacion, Tecnologia e Lengües Minoritàries, qu’aurà lòc es dies 27 e 28 de noveme de 2025, ena Audiovisuau de Vielha (Val d’Aran).
Eth congrès compde damb era collaboracion deth Grop de recèrca sus es transformacions des mieis audiovisuaus e es sues implicacions en desvolopament politic, culturau e sociau dera Universitat de Lleida, e eth supòrt dera Secretaria Generau entath Rèpte Demografic deth Ministerio para la Transición Ecológica y el Reto Demográfico, HèPic –eth Centre d’Innovacion Territoriau d’Aran (CIT Aran)– e eth Departament de Presidéncia dera Generalitat de Catalunya.
Jos eth lèma “Era IA e es naues tecnologies coma aliades der aranés e des lengües minoritàries ena creacion de contenguts periodistics e audiovisuaus”, aguest eveniment pionèr examinarà eth potenciau dera intelligéncia artificiau e d’autes innovacions tecnologiques entath foment e era vitalitat der aranés e des autes lengües minoritàries der Estat espanhòu e d’autes realitats lingüistiques europèes.
Eth congrès, damb ua clara vocacion internacionau, vò analisar com era tecnologia pòt èster ua oportunitat entà crear e refortir espacis comunicatius pròpris, e tanben conéisher es experiéncies e politiques comunicatives desvolopades per lengües damb mès nombre de parlants, com eth catalan o er eusquera.
Un espaci de trobada academica e de divulgacion entath futur des lengües minoritàries
Eth congrès aurà ua dobla cara: d’un costat, comunicacions especializades d’investigadors e investigadores en comunicacion, tecnologia dera informacion e lengües minoritàries; e, der aute costat, taules redones e conferéncies dubèrtes tà toti es publics.
Es tres èishi tematics principaus que se tractaràn son:
IA e naues tecnologies entara creacion de contenguts audiovisuaus en lengües minoritàries.
Viabilitat de formats periodistics en lengües minoritàries.
Hilats sociaus e contenguts viraus en lengües minoritàries. 
Er objectiu principau ei definir estratègies que permeten qu’era tecnologia sigue ua aliada fondamentau. Per açò, aguest congrès se concep com un punt de gessuda entara creacion d’un laboratòri de contenguts en aranés e entà generar aliances estrategiques entre comunautats lingüistiques minoritàries e mieis de comunicacion.
Organizacion e participants
Aguest eveniment s’adrece a investigadors e investigadores en comunicacion, tecnologia dera informacion e lengües minoritàries; a expèrts e expèrtes en politiques publiques a favor des lengües; a periodistes; a gestionaris de mieis de comunicacion; a creadors e creadores de contenguts; ara ciutadania e ara societat civiu en generauen favor der aranés e d’autes lengües minoritàries.
Informacion de contacte: I Congrés Internacional sobre Comunicació, tecnologia i llengües minoritàries. La IA i les noves tecnologies com a aliades de les llengües minoritàries en la creació de contingut periodístic i audiovisual
Vielha, 17 de noveme de 2025