• En marcha era dusau fasa deth pilòt impulsat peth Conselh Generau d’Aran e era Generalitat de Catalunya, e desvolopat pera empresa aranesa Pirineos Drone en marc dera iniciatiua Àrees Digitals.

• Se realizaràn 100 vòls damb dròns de carga entà transportar materiaus tà localizacions aluenhades d’Aran entà balhar supòrt ara ramaderia, as refugis de montanha e ara mantenença des hilats de telecomunicacions.

• Eth permís autrejat pera Agéncia Estatau de Seguretat Aèria (AESA) a Pirineos Drone entà hèr aguesti tipes de vòls de dròns, mès enlà dera capacitat visuau deth pilòt, ei eth prumèr que s’autorize en tota Espanha.

Es prumèrs vòls de dròns de carga entre diferentes localizacions dera Val d’Aran an dat eth trèt de gessuda aguesta setmana ara dusau fasa deth projècte pilòt ARCHYTAS, impulsada peth Conselh Generau d’Aran e era Generalitat de Catalunya, e desvolopada pera empresa aranesa Pirineos Drone en marc dera iniciatiua Àrees Digitals. Aguesta dusau fasa a per objectiu realizar 100 vòls damb dròns entà transportar materiau tà 5 localizacions d’accès dificil en Aran entà balhar supòrt a sectors coma era ramaderia, es refugis de montanha e eth manteniment des hilats de telecomunicacions.

Er inici d’aguesta dusau fasa deth pilòt se produsís dempús de qu’era empresa aranesa Pirineos Drone age auut de superat totes es exigéncies e requisits legaus, tecnics e de seguretat operacionau de besonh entà arténher era autorizacion dera Agéncia Estatau de Seguretat Aeria (AESA) entà amiar a tèrme vòls BVLOS damb eth modèl DJI Flycart30 en vòls automatitzats dehòra dera capacitat visuau .

Aguest tipe de vòls BVLOS (der anglés, Beyond Visuau Line of Sigh) permet realizar es trajèctes de dròns mès delà dera capacitat visuau deth pilòt, hèt qu’exigís un plus de contraròtle dera rota entà garantir era seguretat en aire e tèrra.

Eth permís autrejat a Pirineos Drone entà hèr aguesti vòls ei eth prumèr que s’autorize en Espanha damb aguestes caracteristiques, per aquerò, aguest procès a exigit ua excelléncia operativa superada e place era enterpresa aranesa ath capdeuant deth sector UAV (Unmanned Aerial Veïcul, Veïcul Aerian Non Tripulat) en nòste país.

Servici de transpòrt tà lòcs aluenhats mès sostenible e economic

Aguest succès ère un pas primordiau entà poder començar a amiar a tèrme eth projècte ARCHYTAS II, que preve realizar 100 vòls des caracteristiques autorizades entà transportar mercaderies en tot arténher era estandardizacion d’aguestes operacions.

Aguesti transpòrts serviràn entar aprovisionament de materiaus en localizacions de montanha de dificil accès en Aran entà prestar servicis as pagesi/es, as refugis de montanha e ath mantenimnet des hilats de telecomunicacions. Es trajèctes se realizaràn en 5 localizacions araneses: Pic deth Dossau, Bassa d’Arres, Artiga de Lin, Porcingles e entorns de Garòs.

Aguest nau mejan de transpòrt ven a corbir un nau servici entà portar aqueri materiaus de carga pesada tà lòcs aluenhats, un transpòrt que, damb d’auti mejans, supause un impacte ambientau e un còst economic mès elevat

Ath delà, aguest projècte permeterà estudiar en prigonditat es mecanismes mès efectius entà superar eth rèpte dera orografia advèrsa des montanhes e era manca de connectivitat de diuèrsi punts deth territòri entà que poguen establir-se solucions a long tèrme.

Un projècte sorgit en Airau Digitau Aran

Eth Conselh Generau d’Aran, a trauès de l’HèPic CIT Aran, e era Generalitat de Catalunya, a trauès dera Secretaria de Politiques Digitaus deth Departament d’Empresa e Trabalh e erIDAPA, an participat en finançament d’aguesta dusau fasa deth projècte en marc dera iniciatiua  Àrees Digitals, impulsada peth Govèrn damb eth supòrt dera Fondacion Mobile World Capital Barcelona e eth centre de recèrca i2CAT entà fomentar er ecosistèma e es estrategies d’aplicacion de tecnologies digitaus auançades en tot Catalonha e generar atau naui projèctes e inversion en innovacion e desvolopament en territòri.

En aguest cas, eth pilòt ei adscrit ar Airau Digitau Aran, que compde damb eth supòrt locau deth Conselh Generau d’Aran, er Institut entath Desvolopament e era Promocion der Alt Pirineu e Aran (IDAPA), era Diputació de Lleida e era Cambra de Comerç de Lleida. 

En paraules deth conselhèr d’innovacion deth Conselh Generau, Oriol Sala: “Aguest pilòt ei era prumèra oportunitat de hèr pròves damb sistèmes de mobilitat aeriana non tripulats entre diferentes localitats e se realizarà ena Val d’Aran. En aguest sens, es zònes ruraus auem un avantatge comparatiu respècte des nuclèus urbans gràcies ara baisha densitat de poblacion e l’auem d’aprofitar entà desplegar e hèr recèrca en aguesta tecnologia”.

Entara secretària de Politiques Digitaus dera Generalitat de Catalunya, Maria Galindo, “aguest pilòt ei ua mòstra mès deth compromís deth Govèrn damb eth territòri, en aguest cas a trauès dera iniciatiua Àrees Digitals, qu’ei un estrument clau entà desvolopar modèls de negòci de naut valor hijut, refortilhar era economia locau, contribuïr ara creacion de lòcs de trabalh e ara generacion e retenguda deth talent, diversificar eth teishut empresariau e ajudar a redusir eth despoblament per tot Catalonha”. 

Vielha,  21 de noveme de 2025