• Aguesta naua ordenança, que modifique era anteriora en quauqui aspèctes tà adaptar-la ara normativa actuau vigenta, contemple tot eth territòri aranés e serà d’obligatòri compliment ara ora d’accedir a zònes de montanha.

Eth Plen extraordinari deth Conselh Generau d’Aran, celebrat aué ena sedença institucionau, a aprovat era naua ordenança reguladora der accès motorizat ath miei naturau, un tèxte que majoritàriament replique es articles definits ena lei 9/1995, de 2 de junhsèga, de regulacion der accès motorizat ath Mèdi Naturau, dera Generalitat de Catalonha.

En aguest nau ordenament, s’implementen mesures concrètes de regulacion d’accès motorizat as espacis naturaus en sason de maxima afloéncia de visitaries, concrètaments enes ribères de Valarties, Aiguamòg e ribèra deth Joèu, e tanben der accès motorizat entàs airaus dera Bassa d’Oles, dera Bassa d’Arres e de Varradòs-Saut deth Pish.

Era naua ordenança s’a aprovat damb es vòts a favor d’Unitat d’Aran e es vòts en contra de Convergéncia Democratica Aranesa, qu’a argumentat eth sòn vòt contrari en tot alegar qu’aguesta normativa non permet er accès motorizat damb motos de nhèu as visitaries de dusaua residéncia que non siguen empadronadi.

Er objectiu dera aprobacion d’aguesta ordenança passe per milhorar era qualitat e era preservacion des espacis naturaus seguint es critèris de bones practiques recuelhudi enes programes de Resèrva dera biosfèra e espacis naturaus protegits, atau coma tanben era regulacion, ordenacion e contròl der accès motorizat entà hèr-lo compatible damb era activitat economica e era sostenibilitat ambientau.

Damb era aprobacion d’aguest nau tèxte se simplifiquen e actualizen tanben es tràmits e es mesures de regulacion des espacis naturaus entà adaptar-les ara realitat d’Aran.

Aguesta naua ordenança se base ena aprobada en 2014 e sonque hèr qu’adaptar-se a qüestions relacionades damb era normativa actuau atau coma as critèris de sostenibilitat ambientau, territoriau e economica.

Vielha, 19 de deseme de 2025