Era Associacion Catalana de Municipis (ACM), a trauès dera Fondacion d’Impuls deth Territòri (FMIT), eth Conselh Generau d’Aran e es Deputacions de Barcelona, Girona, Lhèida e Tarragona an signat aué un convèni de collaboracion entà méter en foncionament un nau servici d’assisténcia urbanistica adreçat a toti es ajuntaments, damb ua atencion especiau as municipis damb mens recorsi pròpris.
Er acòrd a coma objectiu aufrir supòrt tecnic e juridic especializat en matèria urbanistica, un des encastres mès complèxes dera gestion municipau, mercat per ua normativa cada còp mès exigenta e pera manca generalizada de personau especializat. Aguest nau recors a de servir entà agilizar es formalitats urbanistiques, melhorar era qualitat e refortir era seguretat juridica des accions municipaus, e meterà a disposicion des ajuntaments equips d’expèrts que complementen es servicis tecnics locaus.
Eth Conselh Generau d’Aran e es quate deputacions garantiràn era logistica e era proximitat territoriau deth servici, damb era volontat qu’arribe a toti es municipis de Catalonha e non se concentre sonque enes granes ciutats o airaus metropolitans. Er objectiu ei redusir es desigualtats territoriaus e assegurar que toti es ajuntaments, independentament dera sua dimension, dispausen des airines de besonh entà gestionar eth planejament urbanistic damb garanties.
Parallèlament, era ACM impulsarà, a trauès dera FMIT, un plan de formacion especifica en urbanisme adreçat a cargues elèctes e personau tecnic municipau. Aguest programa a coma finalitat melhorar eth coneishement deth marc normatiu e des bones practiques en planejament e gestion urbanistica, redusir era complexitat percebuda, combàter era nomentada «burocràcia defensiva» e dotar as ajuntaments de mès airines entà préner decisions damb seguretat juridica.
Eth convèni signat aué s’inscriu en ua estratègia mès ampla de reforçament der urbanisme locau, ja que complementen era formacion especializada damb un supòrt tecnic continuat enes municipis, especiaument enes petiti e mejans.
Vielha, 13 de gèr de 2026