• Era conselhèra de Territòri dera Generalitat de Catalunya, Silvia Paneque, visitèc ager eth Conselh Generau d’Aran a on siguec recebuda pera sindica d’Aran, Maria Vergés entà mantier ua trobada bilaterau tà tractar, entre d’auti, ahèrs coma eth traspàs competenciau en matèria d’urbanisme e abitatge, segontes mèrque era Lei de Regim Especiau d’Aran, atau coma er impuls dera mobilitat sostenibla en Aran dera man tanben dera adequacion dera carretèra C-28.

• Posterioraments, s’amièc a tèrme ua amassada damb es conselhèrs de Territòri e Abitatge deth Conselh Generau d’Aran ena que tanben i participèren es secretaris generaus de Territòri e Abitatge dera Generalitat, e d’auti tecnics d’andues administracions.

Era trobada mantenguda ager entre eth govèrn d’Aran e eth departament de Territòri dera Generalitat forme part des diuèrsi trabalhs qu’amie a tèrme eth Conselh Generau d’Aran entà reforçar eth marc competenciau d’Aran en àmbits tant destacadi coma er abitatge e er urbanisme.

Era grèu crisi de manca d’abitatge assequible ena Val d’Aran ei un des ahèrs centraus dera accion deth govèrn d’Aran e ei pr’amor d’aquerò que considère de besonh que, en tot seguir çò que mèrque era Lei d’Aran, era maxima institucion aranesa pogue compdar damb eth marc juridic e compentenciau que permete amiar a tèrme actuacions qu’ajuden a paliar era actuau situacion.

Atau donc, un des acòrds artenhudi ager siguec eth traspàs per part dera Generalitat de recorsi entà dotar ath Conselh de personau tecnic que pogue trabalhar en encastre der abitatge entà desvolopar accions contemplades en Plan d’Abitatge d’Aran. N’aguest sens, eth desvolopament deth Plan 50.000 en matèria d’abitatge impulsat pera Generalitat de Catalunya, inclodirà tanben actuacions en Aran que permeten eth bastiment de naui abitatges de loguèr assequible. Ena prumèra convocatòria d’aguest plan, er Ajuntament de Vielha e Mijaran ja aufric un solar, e se demore qu’entara dusau convocatòria d’auti ajuntaments aranesi poguen aufrir solèr municipau entà bastir abitatge per part dera Generalitat.

Era sindica d’Aran, Maria Vergés, manifestaue que “resulte indispensable que totes es administracions trabalhem conjuntament entà trobar solucions a cuert, miei e long plaç en matèria d’abitatge” e higie que “eth desvolopament deth Plan 50.000 dera Generalitat en Aran a d’èster ua prioritat deth govèrn catalan deuant dera grèu situacion que viu eth nòste territòri”.

Laguens dera madeisha trobada bilaterau, s’acordèc tanben era activacion dera Comission dera Agenda de Mobilitat Sostenibla, entà tractar sus es accions de besonh entara melhora dera C-28 atau coma des actuacions possibles en matèria de mobilitat sostenibla en Aran. Ei previst qu’aguesta Comission s’amasse eth pròplèu mes de hereuèr.

Vielha, 16 de gèr de 2026