• Er espaci de trabalh compartit plaçat en Vielha a cubèrt es places fixes ath long de tot eth 2025.   

Eth coworking impulsat per HèPIC, eth centre d’innovacion territoriau deth Conselh Generau d’Aran, ei un espaci a on toti aqueri professionaus que vòlen empréner o teletrabalhar pòden dispausar d’un espaci en centre de Vielha, ja siguen persones residentes en Aran o visitaires.

Aguest servici, public e gratuït, compde damb dus formats d’accès; temporau, entàs persones qu’agen de besonh trabalhar en remòt pendent mens de 15 dies, e fixe, entad aqueri professionaus residents en Aran qu’emprenen o teletrabalhen entà ua empresa e non an oficina pròpria. Entad aguest darrèr format, compdam damb 10 places que s’an cubèrt ath long de tot eth 2025.

Enguan, 43 persones an accedit pendent periòdes de cuerta durada, sustot en temporades de mès afluéncia toristica: Nadau, setmana santa e ostiu, permetent-les alongar es dies de visita en Aran.

Er accès tad aguesta installacion foncione damb un contròl digitau, çò que permet adaptar-se as diferenti oraris  des persones usatgères, damb accès es 24 ores es 7 dies dera setmana. Era capacitat der espaci ei de 16 places de trabalh damb taules compartides, a on s’aufrís connexion a internet, ua impressora, 3 sales entà hèr amassades, 1 banh e 1 office damb nevèra, microondes e cafetèra.

Segontes es dades remassades enguan, eth 80% de persones damb plaça fixa e eth 53,12% des sollicituds d’accès temporau son hemnes, e era afluéncia deth coworking ei principaument de hemnes.

En relacion damb eth lòc d’origina, es usatgèrs e usatgères de cuerta durada an estat eth 82% dera província de Barcelona, e des persones damb plaça fixa, maugrat qu’eth 90% son neishudi dehòra (principaument tanben en Barcelona), eth 70% actuaument son empadronadi ena Val d’Aran.

En paraules deth conselhèr d’Innovacion, Oriol Sala: “es resultats des percentatges d’enguan demòstren eth besonh d’aguest servici public coma airina entà atrèir e retier eth talent en Aran”. E hig: “Tanben relheuam era importància de facilitar installacions a on propiciar sinèrgies professionaus que pòden dar lòc ara creacion de naui projèctes d’emprenedoria”. 

Ua auta importanta hita ei era possibilitat d’aufrir un lòc entà professionaus de sectors fòrça diuèrsi que facilite era conciliacion familiau, e tanben era practica d’espòrts de montanha damb eth trabalh entà potenciar era arribada de naui professionaus tath territòri.

Se voletz saber mès sus eth coworking o formalizar ua sollicitud, mos podetz contactar a trauès deth corrèu: infohepic@aran.org.

Vielha, 6 de hereuèr de 2026