• Era cunhèra termica Panda iRes aufrís ua solucion integrada e transportabla entà ua milhor atencion possibla damb capacitats coma: reanimacion complèta, freqüéncia cardiaca a trauès d’un ECG e monitorizacion de Sp02.

• Aguest nau equipament, finançat pera Deputacion de Lhèida, damb un còst totau de 33.275€ permeterà milhorar era qualitat des suenhs aufrits ara mainadèra acabada de nèisher.

Er Espitau Val d’Aran ven d’aquerir ua cunhèra termica Panda iRes damb reanimador que permet milhorar era qualitat des suenhs aufrits ara mainadèra acabada de nèisher, e qu’a estat finançada ena sua totalitat pera Deputacion de Lhèida per valor de 33.275€. Incorpòre un sistèma integrat entà arténher ua assisténcia medicau damb confiança, qu’aplique tecnologia ResusView entà configurar era cunhèra damb capacitats coma: reanimacion completa, freqüéncia cardiaca a trauès d’un electro cardiograma (ECG)  e monitorizacion de Sp02. 

Fomente es suenhs centradi en neurodesvolopament neonatau, e s’ajuste as besonhs des repopets, deth personau medicau e dera familha. 

Era cunhèra termica tostemp ei en mòde de lhet dubèrt, sense cubèrta ne hiestretes. Es calaishi en moviment permeten er accès des pairs/mairs en posicion seiguda entà fomentar eth ligam afectiu damb eth mainatjon. 

Aguest nau equipament ath servici der Espitau Val d’Aran dispause de: mòde entà cauhar rapidaments e de manèra intelligenta, mòde de contròtle deth pacient (en aguest cas eth repopet) e mòde manuau. Tanben permet monitorizar era temperatura deth repopet se se li place ua sonda de temperatura, incorpòre tecnologia Sp02 (tà calcular er oxigèn que i a ena sang), un modul de reanimacion neonatau e un modul d’electrocardiograma.

Entath govèrn d’Aran, damb aguest nau equipament  “volem garantir ua atencion segura e de qualitat as acabadi de nèisher, ua prioritat entath nòste sistèma de salut. Compdar damb ua cunhèra termica enes espitaus non ei un luxe, senon un besonh basic que permet protegir era vida e era salut des repopets des des sues prumères minutes, especiauments d’aqueri en situacion de vulnerabilitat. Aguest equipament ei fondamentau entà previer complicacions e assegurar un inici de vida en condicions dignes e segures”. 

Vielha, 10 de hereuèr de 2026