Es actes, qu’enguan viren ath torn des diferentes manères de cuedar, auràn lòc deth 5 ath 8 de març damb exposicions, charrades e era 12au Corsa dera Hemna.

Es Servicis Assistenciaus Integrats d’Aran an elaborat eth calendari d’activitats restacat damb eth Dia Internacionau dera Hemna, que se celèbre eth 8 de març. Entà commemorar aguesta jornada, es dies 5, 6 e 8 de març i aurà desparières accions dubèrtes a tot tipe de public.

Eth 5 de març, a compdar des 18.30, era Bibliotèca Generau de Vielha acuelherà era exposicion des òbres e procèssi creatius dera 2au edicion deth projècte “Sabers Collectius”, en diuèrsi airaus: husteria, ceramica, textil e linogravatge. Se tracte d’ua mòstra d’aquerò que passe quan pensam es suenhs damb es mans, eth còs e era comunitat. Tanben se presentarà ua revista deth procès que i a auut, e se barrarà er acte damb un aperitiu.

Eth 6 de març, entàs 18.30, era sala de premsa deth Conselh Generau d’Aran acuelherà era charrada “Suenh e Espòrt” damb Paula Fernández-Ochoa, autora deth libre “Vivir corriendo”. Ua convèrsa sus eth suenh, er espòrt, era exigéncia e es limits. Córrer e arrir tanben damb ua guardada de genre.

Entà acabar, eth 8 de març, tàs 11.00, damb gessuda e arribada ena Plaça d’Aran, se harà era 12au Corsa dera Hemna dera Val d’Aran. Ua corsa que ja ei un classic d’aguesta jornada reivindicativa e que sage d’amassar e visibilizar es desigualtats, deféner eth dret a cuedar e a èster cuedades, e sostier era vida collectivament. E, en acabar era corsa, era conselhèra de Joenessa, Igualtat e Inclusion Sociau, Maria Menis, liegerà eth manifèst deth 8-M e, tà barrar es actes d’enguan, se liuraràn es prèmis dera corsa.

“Eth 8 de març (Dia Internacionau dera Hemna) ei ua data que non sonque servís entà reconéisher es auanci qu’auem artenhut en matèria d’igualtat, senon entà reflexionar sus es rèptes qu’encara auem per deuant. Eth Conselh Generau d’Aran vò hèr a préner consciéncia ara gent de totes aqueres causes qu’encara auem d’assolidar. Enguan es actes viren ath torn des suenhs, un espaci a on encara mos i auem de predar fòrça”, comente era conselhèra de Joenessa, Igualtat e Inclusion Sociau, Maria Menis. E hig que: “ei de besonh era participacion de toti entà ajudar a visibilizar es desigualtats de genre qu’encara i a aué en dia en aguest e en fòrça d’auti sectors dera nòsta societat”.

Vielha, 24 de hereuèr de 2026