• Eth passat 1 de març, era pista Stadium de Baqueira Beret a Beret siguec er scenari dera Finau Nacionau d’Esquí Aupin des Jòcs Esportius Escolars de Catalonha, ua jornada qu’amassèc a joeni esportistes de tot eth país en un ambient de competicion, conviuença e passion pera nhèu.

Era pròva, organizada peth Conselh Esportiu dera Val d’Aran amassa damb era Unió de Consells Esportius de Catalunya, amassèc a mès de 150 esportistes des categories prebenjamina enquia senior, consolidant atau era Val d’Aran coma territòri de referéncia en espòrt d’iuèrn e en organizacion d’eveniments escolars de naut nivèu.

Ath long dera jornada se disputèc era pròva de slalom gegant en totes es categories, damb ua grana participacion e un naut nivèu tecnic.

Aguesti son es resultats destacables des esportistes deth Programa d’Esquí Aupin dinamizat peth Conselh Esportiu dera Val d’Aran:

• Axel Rella– 1èr classificat, Categoria Infantila masculina (57.10)
• Marc Puig Feixa– 1èr classificat, Categoria Senior masculina (48.68)
• Vera Manero– 1èra classificada, Categoria Infantila femenina (1:10.98)
• Yvette Cernadas– 2au classificada, Categoria Infantila femenina (1:11.54)
• Iria Bernal– 3au classificada, Categoria Alevin femenina (1:13.73)
• Biel Gregorio– 3au classificat, Categoria Alevin masculina (1:09.79)
• Lia Yáñez– 3au classificada, Categoria Cadet femenina (1:07.34)

Mès enlà des resultats, era jornada metec en valor eth trabalh constant que se hè dera basa entà fomentar era practica esportiva entre es mainatges e joeni.

Eth papèr des Conselhs Esportius

Es Conselhs Esportius son entitats que trabalhen entà promòir er espòrt en edat escolara, facilitant que toti es mainatges e mainades, independentament deth sòn nivèu o situacion, poguen accedir ara practica esportiva. Organizen competicions, jornades e activitats que combinen formacion, valors e convivéncia, e son ua pèça clau en desvolopament esportiu deth territòri.

Era sua accion va fòrça mès enlà dera competicion: fomente abituds saludables, trabalhe era cultura der esfòrç, eth respècte e eth trabalh en equipa, e contribuís ara coesion sociau.

Compromís damb es politiques publiques esportives

Eth Conselh Generau d’Aran collabòre de hè fòrça ans damb eth Conselh Esportiu dera Val d’Aran entà garantir qu’era practica esportiva sigue possibla a nivèu popular e arribe en totes es cases e familhes dera Val d’Aran.

Es politiques publiques esportives an un papèr estrategic: asseguren era igualtat d’oportunitats, mantien e melhoren es installacions, dan supòrt ara organizacion d’eveniments e invertissen en formacion e promocion der espòrt base. Aguest supòrt institucionau, hè possible arténher eth nivèu d’accessibilitat e qualitat que caracterize er espòrt escolar en nòste territòri.

Era celebracion d’aguesta Finau Nacionau en Beret ei un exemple clar d’aquerò que se pòt arténher quan administracions, entitats e comunitat trabalhen amassa damb ua vision compartida: hèr der espòrt ua airina de creishement personau e collectiu.

Era Val d’Aran reafirme atau eth sòn compromís damb er espòrt formatiu, inclusiu e de qualitat, metent es persones e es familhes en centre des sues politiques esportives.

Vielha, 04 de març de 2026