Jos eth nòm “Parlam d’Aran. Parlam de tu” era sindica d’Aran, Maria Vergés, acompanhada pes conselhèrs e conselhères de govèrn, visitaràn toti es pòbles dera Val d’Aran entà presentar eth trabalh amiat a tèrme peth Conselh Generau d’Aran atau coma entà escotar e balhar respòstes ara ciutadania aranesa  n’aguesti actes dubèrti a toti. 

Eth Govèrn d’Aran a començat un torn de visites tàs pòbles dera Val d’Aran entà amassar-se damb es vesins e veies en tot presentar-les es auanci mès destacadi dera accion de govèrn atau tanben coma entà establir un canau de comunicacion dirècte damb era ciutadania e conéisher es impressions, opinions e dubtes que poguen plantejar.

“Damb aguestes visites pretenem balhar transparéncia ara ciutadania per çò que hè ath trabalh deth Conselh Generau d’Aran atau coma daurir un espaci entara participacion e comunicacion entre govèrn e vesins e vesies”  explicaue era sindica d’Aran.

Era ronda de trobades a començat aué en pòble de Betren e progressivaments se balharà era informacion damb antelacion sus eth calendàri de visites de cada pòble.

Vielha, 10 de març de 2026