• Eth recitau poetic aurà lòc dissabte,21 de març, entàs 18 ores, ena Bibliotèca Generau de Vielha.

 Aguest eveniment, que ja hè tretze ans qu’organize eth Musèu dera Val d’Aran, ei ua des activitats culturaus mès consolidades a participatives laguens dera programacion des Musèus dera Val d’Aran. Era jornada s’a premanit en collaboracion damb es bibliotèques de Vielha e Salardú, er Airau de Lengua deth Conselh Generau d’Aran e er Archiu Generau d’Aran. 

Eth hiu conductor dera serada ei restacat damb era tematica deth musèu d’enguan: era enfança. Eth recitau se presente en format teatralizat, dinamic e participatiu, entà qu’eth public de totes es edats ne pogue gaudir. Ath delà des poèmes, se compdarà damb actuacions musicaus en dirècte.

Era diuersitat lingüistica serà fòrça presenta e i aurà enquia 8 lengües diferentes, damb es sues pròpries varietats dialectaus.

Coma cada an, se liurarà ua publicacion damb es poèmes deth recitau, entà seguir era serada e emportar-se un rebrembe.

Eth recitau serà retransmetut en dirècte peth canau de YouTube de Musèus Val d’Aran: https://www.youtube.com/watch?v=wlF2xepcEg0 

En acabar, eth video serà disponible en aguest canau entà futures visualizacions. Es assistents e participants poiràn publicar enes hilats sociaus fòtos e videos der acte damb era etiqueta #anderaenfança2026.

 Vielha, 19 de març de 2026