- Eth Conselh Generau d’Aran vò remercar era foncion deth territòri coma espaci de vida activa, a on era montanha, es espòrts en aire liure e es abituds saludables son part dera identitat collectiva.
Eth Conselh Generau d’Aran, a trauès deth Departament d’Espòrts, e eth SABS, se higen ara commemoracion deth Dia Mondiau dera Activitat Fisica (DMAF), que se hè eth 6 d’abriu, damb era volontat de promòir er exercici fisic coma element clau entara salut e eth benèster dera populacion.
Aguesta jornada, impulsada peth Departament d’Esports de la Generalitat de Catalunya e era Agència de Salut Pública (ASPCAT), a coma objectiu sensibilizar sus era importància de mantier ua vida activa e lutar contra eth sedentarisme, un des principaus factors de risc entara salut.
Jos eth lèma d’enguan, “Mès moviment, mès vida”, se convide ara ciutadania a incorporar era activitat fisica en sòn dia a dia e a hèr deth moviment ua abitud saludabla.
Era Val d’Aran, damb un entorn naturau privilegiat e ua fòrta cultura esportiva, ei un scenari ideau entà promòir era activitat fisica ath long de tot era an.
Eth Conselh Generau d’Aran vò remercar era foncion deth territòri coma espaci de vida activa, a on era montanha, es espòrts en aire liure e es abituds saludables son part dera identitat collectiva.
En aguesta linha, eth Conselh Generau d’Aran e eth SABS hèn ua crida dubèrta ara ciutadania e ath conjunt deth teishut associatiu entà implicar-se activament ena celebracion deth DMAF:
- Incorporant era activitat fisica ena vida vidanta
- Participant enes activitats organizades
- Impulsant naues iniciatives des entitats esportives, sociaus e educatives
Er objectiu ei generar ua dinamica collectiva que consolide ua societat mès activa, saludabla e coesionada.
Eth conselhèr d’Espòrts deth Conselh Generau d’Aran, Javier Cavero, a declarat que: “Eth Dia Mondiau dera Activitat Fisica ei ua oportunitat entà reafirmar eth nòste compromís damb era salut e eth benèster dera ciutadania. Era Val d’Aran a toti es elements entà èster un territòri referent en vida activa, e açò ei responsabilitat de toti.”
Cavero a volut méter en valor tanben era foncion des entitats deth territòri:
“Eth teishut associatiu aranés ei clau. Sense era implicacion des clubs, associacions e collectius, non serie possible generar aguesta cultura deth moviment que volem entath present e futur.” E a hijut: “Hèm ua crida a totes es entitats entà que prepausen activitats e ajuden a hèr d’aguesta jornada un vertadèr moviment collectiu en tota era Val d’Aran.”
Eth SABS a organizat ua activitat gratuïta e dubèrta:
Session de iòga:
- 9 d’abriu de 2026, tàs 10.30 ores
- Dirigida per Eri Sakamoto
- Espaci d’Atencion Infantila, Juvenila e tàs sues Familhes (c/Pomaròla, 12, Vielha)
- Inscripcions: en esakamoto@aransalut.com (places limitades)
Ua activitat pensada entà fomentar eth benèster fisic e emocionau en contacte damb er entorn.
Eth Conselh Generau d’Aran torne a afirmar eth compromís d’impulsar politiques publiques que promòiguen era activitat fisica e era salut, e trabalhar de manèra coordinada damb es agents deth territòri.
Eth Dia Mondiau dera Activitat Fisica ei, per aguesti motius, fòrça mès qu’ua jornada: ei ua oportunitat entà consolidar ua vision compartida d’ua Val d’Aran activa, sana e connectada damb eth sòn entorn.
Tota era informacion dera campanha: https://esport.gencat.cat/ca/arees_dactuacio/activitat-fisica-i-salut/dia-mundial-de-lactivitat-fisica-dmaf-6-dabril/
Vos encoratjam a participar e a compartir es vòstes prepauses enes vòsti hilats sociaus etiquetant a @conselharan @aran_salut e damb eth hashtag #DMAF2026
Vielha, 30 de març de 2026