• Era aportacion economica deth Conselh Generau d’Aran e eth compromís deth Ajuntament de Naut Aran dera cession deth 50% dera sua taxa toristica permeten impulsar aguesta naua inversion ath torn deth torisme en territòri.

Eth Conselh Generau d’Aran consolide era sua posicion coma èish vertebrador deth desvolopament toristic ena Val d’Aran damb eth bastiment dera naua oficina de torisme de Salardú, en coordinacion damb er Ajuntament de Naut Aran.

Aguest projècte, que ja a iniciat es sues òbres ena plaça dera Querimònia, en Salardú, compde damb un pressupòst totau de 199.504,36 euros. D’aguesta quantitat, 50.000 euros provien dera aportacion dirècta deth Conselh Generau d’Aran a trauès deth convèni de collaboracion vinculat ara taxa toristica, çò que met en valor eth compromís dera maxima institucion aranesa damb eth desvolopament equilibrat e sostenible deth territòri.

Aguest finançament ei frut dera cooperacion institucionau entre eth Conselh Generau d’Aran  e er Ajuntament deth Naut Aran, laguens d’un modèl que garantís qu’era recaptacion dera taxa toristica revertisque dirèctament en milhores entà visitants e vesins. En aguest sens, eth retorn der Ajuntament de Naut Aran ara estructura de gestion toristica compartida a estat clau entà arténher acòrds coma aguest.

Era sindica d’Aran, María Vergés, ena sua visita ara zòna a on se plaçarà era naua bastissa, a declarat: “Aguest ei un exemple clar de collaboracion entre administracions, que mos permet dar un nau impuls entà hèr mès visible tota era aufèrta toristica de Foment Torisme Val d’Aran en territòri, damb era creacion d’un nau punt d’informacion entès usatgèrs.”

Es òbres, damb ua durada prevista de tres mesi, permeteràn dotar a Salardú d’un equipament modèrn, foncionau e alineat damb es exigéncies actuaus deth sector toristic. Ath madeish temps, aguest projècte s’inscriu laguens d’ua estratègia globau liderada peth Conselh Generau d’Aran entà consolidar era Val d’Aran coma destin toristic de referéncia, melhorant tant es infraestructures coma era experiéncia des visitaires.

Vielha, 07 d’Abriu de 2026