• A trauès d’aguesti concorsi, eth Govèrn d’Aran promocione er emplec der aranés ena literatura e era creacion d’òbres audiovisuaus ena lengua pròpria d’Aran, tà fomentar era cultura, era creativitat e eth talent deth nòste territòri.

• Eth tèrme d’incripcions ei ena fasa finau.

Eth Departament de Lengua e Cultura deth Conselh Generau d’Aran a convocat era XXVIau edicion des Prèmis Aran de Literatura, XXXVIau Prèmis Mn. Condò Sambeat, IIau Concors de Tictòc e V Concors de Cuertmetratges en Aranés.

Eth prèmi Aran de Literatura a tres categories: poesia, narracion e novèlla juvenila, e ei adreçat as adults (mès de 18 ans). Sonque s’accèpte ua òbra per categoria, mès ua madeisha persona se pòt presentar tàs tres categories.

Eth concors literari Mn. Condò Sambeat compde damb tres nivèus, e i pòden participar escolans de 5au e 6au de primària, estudiants d’ESO e de Bachelierat que non agen hèt encara es 18 ans. I a dues categories: narracion e poesia, e es òbres an d’èster inedites e escrites en aranés.

En çò que tanh ath concors de Tictòc, que pòt èster individuau o en grop, a dues categories: era categoria A, entà joeni de 14 a 18 ans, e era categoria B, tà persones de mès de 19 ans.

En darrèr lòc, eth concors de cuertmetratges enguan a coma tèma es “naues tecnologies”. A coma objectiu promòir un espaci de participacion tà difóner era cultura cinematografica en aranés entre er alumnat des centres d’ensenhament aranesi e entre era populacion d’Aran en generau, damb era realizacion de cuertmetratges e/o òbres audiovisuaus e tanben reflexionar sus tèmes d’actualitat. Ei adreçat as centres educatius e tanben as associacions o persones que i volguen participar.

Eth tèrme de presentacion des trabalhs ei eth deluns 27 d’abriu, entàs 14h30 ores. Trobaratz tota era informacion en: http://aranes.conselhararan.org, @en.aranes, lengua@aran.org o en 973 64 18 01.

Vielha, 17 d’abriu de 2026