Eth Conselh Generau d’Aran acuelh ua session dubèrta sus eth permafròst enes Pirenèus e es rèptes dera montanha deuant eth cambi climatic.

Aguest diuendres, 24 d’abriu, tàs 18.00 ores, se harà ena Sala d’Actes deth Conselh Generau d’Aran, era presentacion deth projècte Permapyrenees, un des actes clau entà apropar aguesta iniciativa ath territòri e ara comunitat.

Era session serà dubèrta ath public e permeterà conéisher de prumèra man es objectius, es rèptes e es oportunitats deth projècte, e tanben er impacte dera evolucion deth permafròst (un tipe de sòu que demore congelat de manèra continuada aumens dus ans seguidi), enes Pirenèus.

Era jornada compdarà damb era participacion de Marc Oliva, professor deth Departament de Geografia e investigador dera ICREA Acadèmia; Edurne Pasaban, alpinista, conferencianta e promotora d’iniciatives restacades ath desvolopament personau; e Jordi Gavaldà, geològ e nivològ deth Centre de Prediccion de Lauegi deth Conselh Generau d’Aran.

Permapyrenees (Interreg POCTEFA, 2024–2027) ei un projècte transfronterèr cofinançat pera Union Europèa, qu’amasse institucions d’Espanha, França e Andòrra entà estudiar eth permafròst e era dinamica des glacèrs rocosi en zònes clau dera nauta montanha des Pirenèus.

Eth sòn objectiu ei generar naui indicadors climatics e melhorar era comprenença des risqui associadi ara degradacion deth permafròst, era inestabilitat de pales e es eslavassades en entorns fòrça freqüentadi. Es membres deth projècte, era Universitat de Barcelona e era Fundació Kilian Jornet son es entitats encargades d’organizar aguesta jornada entà apropar aguest coneishement ara comunitat de montanha.

Se viues en Pirenèu, i trabalhes o simplament sentes qu’ei casa tua, aguesta ei ua oportunitat entà conéisher eth projècte, resòlver dobtes e explorar com era sciéncia mos pòt ajudar a compréner e a protegir milhor eth nòste entorn.

Vielha, 22 d’abriu de 2026