Eth Conselh Generau d’Aran, a trauès deth sòn Departament d’Espòrts, hè ua crida a totes es entitats, clubs, associacions esportives e professionaus independentes dera Val d’Aran entà que participen activament ena formacion gratuïta en linha sus proteccion dera enfància, impulsada peth Departament d’Espòrts dera Generalitat de Catalonha.
Aguesta accion formativa s’encastre laguens dera normativa vigenta en matèria de proteccion dera enfància e adolescéncia, qu’establís era obligatorietat de garantir entorns segurs en totes es activitats esportives.
En concrèt, era Lei Organica 8/2021, de proteccion integrau dera enfància e adolescéncia vèrs era violéncia (LOPIVI), fixe eth besonh que totes es entitats que trabalhen damb menors dispausen de persones formades e referents en aguesta matèria.
En aguest sens, era formacion prepausada ei un airau clau entà:
- Identificar situacions de risc o vulnerabilitat.
- Previer conductes inadequades o violentes.
- Actuar damb responsabilitat e critèri deuant de possibles casi.
- Generar entorns esportius segurs, saludables e educatius.
Eth Departament d’Espòrts deth Conselh Generau d’Aran rebrembe qu’aguesta obligacion non ei opcionau, senon ua responsabilitat legau e etica de totes es organizacions que trabalhen damb mainatges e joeni. Per tant, ei imprescindible qu’es clubs e entitats intègren aguesta formacion en sòn foncionament e la hèsquen a arribar ath conjunt des sues equipes tecniques, dirigents e collaboradors
Ath delà dera obligacion normativa, aguesta iniciativa represente ua oportunitat entà reforçar es valors educatius der espòrt, protegir es persones mès vulnerables e consolidar ua cultura esportiva basada en respècte, ena seguretat e en benèster.
Eth Conselh Generau d’Aran encoratge a tot eth teishut esportiu aranés a implicar-se activament e a dinamizar era participacion intèrna, entà garantir que cap entorn esportiu deth territòri demore dehòra d’aguesta realitat.
En paraules deth conselhèr d’Espòrts, Javier Cavero, aguesta formacion ei un element imprescindible laguens deth compromís deth sistèma esportiu aranés damb era proteccion dera enfància e adolescéncia. Cavero destaque que garantir entorns segurs non ei sonque ua obligacion normativa, senon tanben ua responsabilitat compartida de totes es persones e entitats que formen part deth teishut esportiu.
Vielha, 24 d’abril de 2026