• Entà possar era participacion joena, eth Conselh Generau d’Aran a organizat eth 1èr Fòrum Joenessa damb un acte celebrat en Centre de Joenessa “Antara” de Vielha.

Dissabte passat, 25 d’abriu, se celebrèc eth 1èr Fòrum Joenessa dera Val d’Aran. Un eveniment organizat peth Conselh Generau d’Aran que vò èster un espaci estable de participacion juvenila ena Val d’Aran e que nèish des talhèrs de participacion que s’an hèt en Institut d’Aran pendent es darrères setmanes, e tanben der amàs de dades des enquèstes adreçades as joeni e joenes deth nòste territòri que s’an hèt pendent es darrères setmanes, entà completar aguesta prumèra fasa de participacion ciutadana ath torn dera joenessa.

Eth Fòrum Joenessa a coma objectiu èster un espaci estructurat de recuelhuda dera votz des joeni, a on poguen exprimir es besonhs, inquietuds e prepauses, damb era volontat qu’evolucione de cap a un modèl liderat per eri e eres madeishi. D’aguesta manèra se facilite, non sonque que poguen hèr a arribar en prumèra persona es sues demanes ath Govèrn d’Aran, senon que contribuïsquen activaments ena definicion, orientacion e milhora des politiques de joenessa en Aran.

Era conselhèra de Joenessa, Igualtat e Inclusion sociau deth Govèrn d’Aran, Maria Menis, assistic ar acte celebrat dissabte, entà encoratjar as joeni a hèr-se sòn aguest Fòrum Joenessa, pr’amor que son eth futur deth territòri. Maria Menis, que hec era presentacion der acte e, posteriorament, se heren trabalhs de grop e de dinamizacion damb es joeni a cargue dera equipa tecnica der Airau d’atencion as persones deth Conselh Generau d’Aran.

“Aguest Fòrum Joenessa vò dar votz as joeni, pr’amor que soent pòden sénter qu’es sòns besonhs non son escotadi. Ei ua airina que permet que poguen parlar, expressar-se e díder tot aquerò que les botge, que les motive e an de besonh. Per açò credem que serà fòrça bon entada eri e qu’ajudarà a establir naues formes de comunicacion entre era joenessa e es administracions”, a explicat era conselhèra.

Vielha 28 d’abriu de 2026