Eth Govèrn d’Aran lance dues campanhes de participacion e sensibilizacion ath torn dera joenessa

Era conselhèra de Joenessa, Igualtat e Inclusion Sociau deth Govèrn d’Aran, Maria Menis, a hèt a conéisher, en plen celebrat aué ena Casa deth Senhor d’Arròs, es detalhs des darrères campanhes “Fòrum Joenessa” e “Ací mos coneishem, ací mos cuedam”, aguesta darrèra contra era violéncia en léser nocturn.

En madeish plen s’a aprovat definitivament era naua ordenança de regulacion der accès ath miei naturau.

Era conselhèra de Joenessa, Igualtat e Inclusion Sociau, Maria Menis, a hèt a conéisher, en Plen celebrat aué, es detalhs des dues darrères campanhes promoigudes peth Conselh Generau d’Aran, “Fòrum Joenessa” e “Ací mos coneishem, ací mos cuedam”, aguesta darrèra contra era violéncia en léser nocturn.

Eth dissabte 25 d’abriu, se hec eth 1èr Fòrum Joenessa dera Val d’Aran, un eveniment organizat peth Conselh Generau d’Aran damb era volontat d’èster un espaci estable de participacion juvenila en territòri aranés.

Era conselhèra Menis a explicat que: “Eth Fòrum Joenessa a coma objectiu consolidar-se coma un espaci estructurat de recuelhuda dera votz des joeni, a on poguen manifestar es sòns besonhs, inquietuds e prepauses, damb era volontat qu’evolucione progressivament de cap a un modèl liderat pes madeishi joeni e joenes”.

D’aguesta manèra, se vò facilitar qu’era joenessa pogue hèr a arribar dirèctament es sues demanes ath Govèrn d’Aran e, ath madeish temps, participar activaments ena definicion, orientacion e milhora des politiques de joenessa impulsades en Aran.

Maria Menis tanben a hèt a conéisher es detalhs dera campanha que, dies endarrèr, estreèc eth Conselh Generau d’Aran: “Ací mos coneishem, ací mos cuedam”, damb era que vò conscienciar ara ciutadania sus eth refús contra tot tipe de violéncia enes espacis de léser nocturn.

Era campanha, qu’includís messatges de non-tolerància deuant d’aguest tipe de comportaments, e s’adrece, principauments, as possibles agressors, damb er objectiu de generar consciéncia e responsabilitat, se harà a conéisher enes hèstes majors d’ostiu dera Val d’Aran.

Eth Conselh Generau d’Aran tanben a aprovat en session plenària, de manèra definitiva, era naua ordenança reguladora der accès motorizat ath miei naturau, un tèxte qu’actualize e adapte era normativa vigenta as besonhs actuaus de sostenibilitat, preservacion ambientau e gestion deth territòri aranés.

Eth tèxte replique majoritàriament es articles definidi ena Lei 9/1995, de regulacion der accès motorizat ath Miei Naturau dera Generalitat de Catalonha.

Aguesta naua normativa implemente mesures concrètes de regulacion der accès motorizat enes espacis naturaus pendent es periòdes de maxima afluéncia de visitaires, especiaument enes ribères de Valarties, Aiguamòg e era ribèra deth Joeu, atau coma tanben enes airaus dera Bassa d’Oles, dera Bassa d’Arres e de Varradòs-Saut deth Pish.