• Eth Conselh Generau d’Aran impulse aguest Plan damb eth doble objectiu de, per un costat, balhar supòrt as Ajuntaments entà protegir as pòbles des incendis de sisaua generacion e, per aute, melhorar eth paisatge aranés en tot possar era economia circulara a trauès dera ramaderia e era agroalimentacion.

• Dejà s’a hèt a arribar ua prepausa d’ordenança as Ajuntaments aranesi, resultat des trabalhs deth projècte Ovihuec, que les garantís un marc juridic que les permete actuar en aqueri solars, terrens o parcèles de titularitat privada plaçadi ath cant des pòbles, entara sua neteja e acondicionament en cas de qu’es proprietaris non ac hèsquen.

Eth passat mes d’octobre eth govèrn d’Aran presentaue as ajuntaments aranesi era prepausa de Plan de Gestion deth Paisatge e Proteccion des Pòbles dera Val d’Aran, qu’a coma objectiu protegir es pòbles contra es huecs de siesau generacion e, ath madeish temps, recuperar era gestion paisagistica a trauès dera gestion forestau, era implementacion de carga ramadèra, era metuda en valor deth producte agroalimentari e era innovacion.

Pendent aguesti mesi s’an amiat a tèrme, per part der airau de Pompièrs Emergéncies, es estudis pertinents qu’an permetut auer fiches especifiques entà cada pòble d’Aran a on se detalhen quines son es actuacions de neteja e desbroçament que s’an d’amiar a tèrme.

Atau madeish, eth Conselh Generau d’Aran a hèt a arribar as ajuntaments aranesi, responsables d’aguesta aplicacion, un modèl d’ordenança, desvolopada damb eth projècte Ovihuec, que les les garantís un marc juridic que les permete actuar en aqueri solars, terrens o parcèles de titularitat privada plaçadi ath cant des pòbles, entara sua neteja e acondicionament en cas de qu’es proprietaris non ac hèsquen.

Era prepausa d’ordenança establís era obligacion de mantier es solars e parcèles en condicions adequades de neteja, igièna e seguretat, especiaument pendent eth periòde que va deth 20 de junh ath 30 de seteme, coïncidint damb eth moment de mès perilh d’incendis.

Entre es mesures previstes, cau soslinhar era retirada de vegetacion seca, residus e materiau inflamable, e era proïbicion de hèr cremades enes trabalhs de neteja. Tanben s’establissen critèris entara gestion corrècta des residus vegetaus e non vegetaus.

Eth tèxte includís mecanismes de contraròtle e inspeccion per part des servicis municipaus, atau coma era possibilitat d’execucion subsidiària en cas d’incompliment, repercutint es còsti as persones responsables.

Damb aguesta actuacion, era prevision ei qu’enes pròplèu mesi se poguen amiar a tèrme es prumèri trabalhs de neteja e desbroçament n’aqueri pòbles que, segontes eth critèri tecnic mercat, agen mès risc d’incendi, entà posterioraments, iniciar era dusau fasa que corresponerie ara implementacion de carga ramadèra.

Era sindica d’Aran, Maria Vergés, a manifestat que “damb aguest Plan, qu’aurà un procès d’implementacion long, pretenem, per un costat, potenciar era collaboracion entre administracions e, per aute, suenhar eth paisatge e era seguretat enes nòsti pòbles, ath temps qu’impulsam era diversificacion economica a trauès dera ramaderia, era innovacion e era agroalimentacion”.

Vielha, 21 de mai de 2026